Չեմ կարծում, թե հնարավոր է խոսել ինչ-որ հեռանկարների մասին: Ղարաբաղյան հակամարտությունը հեռու է կարգավորման փուլից: Այս մասին նոյեմբերի 11-ին լրագրողների հետ հանդիպման ժամանակ հայտարարել է Կովկասի ինստիտուտի տնօրեն, քաղաքագետ Ալեքսանդր Իսկանդարյանը:
Նրա խոսքով՝ որոշակի գործընթացներ տեղի կունենան, սակայն իրավիճակն ընդհանուր առմամբ անփոփոխ է:
«Կշարունակվի Մինսկի գործընթացը, դրանից դուրս չեն գա ո՛չ Հայաստանը, ո՛չ Ադրբեջանը, ո՛չ առավել եւս համանախագահները, հանդիպումներ կանցկացվեն, եւ, ցավոք, ես չեմ կարող հայտարարել, որ Ադրբեջանի հետ Հայաստանի եւ Արցախի սահմաններին բռնությունը կդադարեցվի: Կարծում եմ, որ կրակոցներն ու տարբեր տեսակի այլ գործողություններ հետագայում եւս կշարունակվեն: Ես ուրախ կլինեի սխալվել: Այլ հարց է, որ դրանց մակարդակը, 2016-ի համեմատությամբ, էապես նվազել է: Սակայն անհնար է ամբողջությամբ դա բացառել, քանի որ դա Ադրբեջանի ռազմավարությունն է: Մի կողմից, նրանք բանակցություններ են վարում, մյուս կողմից՝ ճնշում գործադրում հայկական կողմի վրա՝ սահմանին բռնության ակտիվացման տեսքով»,- ասել է նա:
Իսկանդարյանի կարծիքով՝ այդ դիրքորոշումը միայն վկայում է այն մասին, որ Բաքուն իրականում շահագրգիռ չէ հակամարտության կարգավորման գործում:
«Ոզնուն էլ է հասկանալի, որ եթե պետք է կարգավորել խնդիրը փոխզիջման ճանապարհով, ինչը պնդում են Մինսկի խմբի համանախագահները, ապա պարզապես պետք է սկսել բանակցել ղարաբաղցիների հետ: Այլ կերպ հնարավոր չէ»,- հավելել է քաղաքագետը՝ նկատելով, որ Ադրբեջանը մոտակա տարիներին լայնամասշտաբ մարտական գործողությունների վերսկսման տեսքով արկածախնդրության չի դիմի, քանի որ դրանք կապված են լուրջ ռիսկերի հետ, որոնց Բաքուն չի կարող դիմել: