Այսօր ԱԺ ապրիլյան դեպքերն ուսումնասիրող քննիչ հանձնաժողովի նիստին կար հրավիրյալ, բայց քանի որ նա ՀՀ սահմաններից դուրս է գտնվում մենք քննարկեցինք եւ գտանք այն ձեւաչափը, որով շփում ենք ունենալու գնդապետ Հովհաննիսյանի հետ: Այս մասին այսօր՝ նոյեմբերի 28-ին, ԱԺ-ում լրագրողների հետ զրույցում նշեց ԱԺ Ապրիլյան պատերազմի հանգամանքներն ուսումնասիրող քննիչ հանձնաժողովի նախագահ Անդրանիկ Քոչարյանը:
«Ինքը մեր կարեւոր հրավիրյալների շարքում է, նա ըստ էության առնչվում է 2016 թվականին մեր հետախուզության ոլորտին: Նա բավականին բարձր պաշտոն է զբաղեցրել մեր հետախուզության համակարգում: Հիմա էլ զբաղեցնում է շատ բարձր պաշտոն Հայաստանի սահմաններից դուրս, մեր շատ լավ սպաներից մեկն է,»,-ասաց նա:
Հարցին, թե արդյոք գեներալ Նորատ Տեր-Գրիգորյանը աջակցելու է հանձնաժողովի աշխատանքին, Քոչարյանը պատասխանեց. «Նորատ Տեր-Գրիգորյանին ես ցանկանում էի, որ գա, բայց նա մեկ ամսվա մեջ 3 անգամ փոխեց իր որոշումները: Ես ափսոսում եմ: Հետո նա նորից կապի էր դուրս եկել, որ պատրաստ է: Ինչ-որ մարդիկ ինչ-որ վախեր ունեն, մեր հարգարժան գեներալին հանդիպում են Մոսկվայում, կամ չեն հանդիպում, կամ զանգահարում են: Չկան վախեր, ամեն ինչ ուղղված է մեր երկիրն ու բանակն ուժեղացնելուն»:
Նա ընդգծեց, որ իրենք ունեն տասնյակ ժամերով տեսագրություններ, ամեն նյութի վրա աշխատում են. «Կարող է 5 ժամ լսենք եւ այնտեղ միայն մի դրվագ անհրաժեշտ լինի, որը չպետք է բաց թողնենք»:
