Ղարաբաղյան հարցով բանակցություններ չկան, եւ դա կարող է լուրջ հետեւանքներ ունենալ, քանի որ բանակցությունների այլընտրանքը պատերազմն է: Այս մասին դեկտեմբերի 17-ին լրագրողների հետ հանդիպման ժամանակ հայտարարեց քաղաքագետ Գարեգին Պետրոսյանը:
Նա նկատեց, որ կարելի է խոսել միայն որոշակի հանդիպումների մասին, քանի որ բանակցությունները ենթադրում են հայկական կողմի մոտ հստակ դիրքորոշում, ինչը բացակայում է: «Նման իրավիճակի համար պատասխանատու են Հայաստանի իշխանությունները: Ադրբեջանին ռազմական գործողություններից զսպում է միայն մարտունակ հայկական բանակը, ինչպես նաեւ Իրանի եւ Ռուսաստանի դիրքորոշումները, որոնք իրենց սահմաններին պատերազմ չեն ցանկանում»,- հավելեց փորձագետը:
«Այլընտրանք» հասարակական կազմակերպության ղեկավար Նարեկ Մանթաշյանը, իր հերթին, հայտարարեց, որ իշխանությունները կեղծ օրակարգերով, ձերբակալություններով հասարակության ուշադրությունը շեղում են ղարաբաղյան խնդրից:
«Օրինակ, հայտարարություններ եղան այն մասին, որ օլիգարխիկ համակարգը հանգեցրեց նրան, որ որոշ մարդիկ օգտվեցին դրանից եւ թալանեցին բանակը, սակայն, ինչպես տեսնում ենք, ոչ ոք դեռեւս պատասխանատվության չի ենթարկվել»,- պարզաբանեց նա:
