Շիրակի մարզպետ Աշոտ Գիզիրյանը «մաքուր բակ» եւ «մաքուր գյուղ» մրցույթներ է կազմակերպում: Ըստ այդմ, կազմակերպվելու են շաբաթօրյակներ, որի ժամանակ մրցույթում հաղթողներին մարզպետը խոստացել է ուղարկել «Ջերմուկ» հանգստյան տուն` հատուկ ուղեգրերով: Այս մասին այսօր` ապրիլի 12-ին Գյումրիում կայացած մարզխորհրդի նիստի ժամանակ` ի գիտություն Շիրակի մարզի բոլոր գյուղապետերի, հայտարարել է ինքը` Աշոտ Գիզիրյանը:
Մարզպետի այս հայտարարությանը անսպասելիորեն միացել է Գյումրիի քաղաքապետ Վարդան Ղուկասյանը, ով մարզխորհրդի նիստի ամբողջ ընթացքում լուռ նստած է եղել, որեւէ հայտարարություն չի արել ու միայն լսել է մարզպետ Գիզիրյանի հորդորները:
Նիստի ավարտին, Ղուկասյանը հանկարծ վեր է կացել ու դիմելով գյուղապետերին, կոչ է արել. «Այ մարդ, ձեր դիմացը մաքուր պահեք էլի»:
Առհասարակ, այսօրվա Շիրակի մարզխորհրդի նիստը բավականին հետաքրքիր ու լարված է անցել: Գիզիրյանը դուրս է հրավիրել բոլոր այն գյուղապետերին, ովքեր մարզխորհրդի նիստին ժամանել են 10 րոպե ուշացումով: «Դուրս գնացեք, դուրս, դուք սրանով ձեզ չեք հարգում: Ի՞նչ է նշանակում 10 րոպե ուշանալ»,- բարկացել է մարզպետը:
Այնուհետեւ Գիզիրյանը տարածքային վարչության պետին առաջարկել է դուրս գալ ու պարզել, թե ինչ է կատարվել դրսում, ինչու համար են ուշացել գյուղապետերը: Շիրակի մարզպետին զայրացրել են նաեւ այն համայնքի ղեկավարները, ովքեր գյուղի եկամուտները հավաքագրել են ցածր տոկոսադրույքներով: Նա մեկ- մեկ ոտքի է կանգնեցրել այդ համայնքների ղեկավարներին ու պատասխան պահանջել, թե ինչու հարկեր չեն հավաքագրել: «Ընկեր Գիզիրյան, խոստանում ենք , որ այսուհետ լավ կաշխատենք»,-խոստացել են գյուղապետերը: