Մենք ունենք ամերիկյան զորքերն Իրաքից դուրս բերելու վերաբերյալ այդ երկրի խորհրդարանի որոշումը, որը պարտադիր ուժ չունի կառավարության համար: Այս մասին այսօր՝ հունվարի 10-ին, լրագրողների հետ հանդիպման ժամանակ նշեց ՀՀ ԳԱ Արեւալագիտության ինստիտուտի տնօրեն Ռուբեն Սաֆրաստյանը:
Նրա խոսքով, Իրաքի կառավարությունը եւս հայտարարել է, որ ինքը նույնպես պատրաստվում է դրան, որ ամերիկյան զորքերը դուրս գան, բայց Իրաքի բնակչության մի մասը դեմ է դրան:
«Մասնավորապես, խորհրդարանի այդ նիստին, որտեղ այդ որոշումը կայացվել է, չեն մասնակցել քրդական ուժերի ներկայացուցիչները, նրանք դեմ են: Դեռ պարզ չէ՝ Իրաքը կպահանջի՞, որ ամերիկյան զորքերը դուրս բերվեն երկրից: Գուցե մի մասը դուրս բերվի, մի մասը՝ մնա»,-ասաց Սաֆրաստյանը:
Ինչ վերաբերում է այս հարցում ԱՄՆ դիրքորոշմանը, նա նկատեց, որ Թրամփի մոտեցումը հետաքրքիր է. «Նա չասաց, թե դուրս չենք բերի մեր զորքերը, նա ասաց՝ դուրս կբերենք, եթե փոխհատուցեք մեր ծախսերը, որ մենք այստեղ ունեցել ենք: Այսինքն սկզբունքորեն նա դեմ չի դրան»: