Եվրոպայի խորհրդի Խորհրդարանական վեհաժողովը ողջունում է Հայաստանում խորհրդարանական ընտրությունների կազմակերպումը միջազգային ստանդարտներին համապատասխան: Այս մասին նշված է հունվարի 30-ին ԵԽԽՎ ընդունած բանաձեւում:
Բանաձեւն ընդունվել է սըր Ռոջեր Գեյլի զեկույցի հիման վրա, որում պարունակվում է 2019 թվականի հունվարից դեկտեմբեր ԵԽԽՎ մոնիթորինգի վերաբերյալ գործունեության ամփոփումը եւ գնահատվում է երկրների առաջընթացը, որոնք ենթակա են մոնիթորինգի կամ հետմոնիթորինգային երկխոսության գործընթացում են:
Պատվիրակները ողջունել են Հայաստանի հանձնառությունը կոռուպցիայի դեմ պայքարին եւ դատական համակարգի բարեփոխմանը՝ դրա անկախության ամրապնդման նպատակով:
Վեհաժողովը միաժամանակ մտահոգություն է հայտնել այն խնդիրների կապակցությամբ, որոնց բոլոր կողմերից դատական մարմինները բախվում են իրենց անկախության եւ անկողմնակալության ապահովման գործում: Վեհաժողովը նշել է հայ հանրության շրջանում պահպանվող անհանդուրժողականությունը եւ բացասական կարծրատիպերը ԼԳԲՏ եւ այլ փոքրամասնությունների հանդեպ, ինչպես նաեւ խոչընդոտները, որոնք հանրության որոշ խմբեր ստեղծում են Եվրոպայի խորհրդի Կանանց նկատմամբ եւ ընտանեկան բռնության կանխման ու պայքարի կոնվենցիայի (Ստամբուլյան կոնվենցիա) դեռեւս անկնկալվող վավերացման ճանապարհին:
Վեհաժողովը Հայաստանի իշխանություններին կոչ է արել արագացնել դատական համակարգի բարեփոխումը՝ դրա անկախության եւ արդյունավետության ամրապնդման նպատակով, ընդ որում՝ խուսափելով ցանկացած գործողությունից, որը կարող է ընկալվել որպես միջամտություն դատական համակարգի աշխատանքին, ինչպես նաեւ կոչ է արել շարունակել ամրապնդել կանանց, ինչպես նաեւ ԼԳԲՏ եւ այլ փոքրամասնությունների իրավունքները: