Հորդանանում եւ Հայաստանում գործող ավիաընկերությունները շահագրգռված չեն զբոսաշրջիկների հոսքը մեծացնելու նպատակով երկու երկրների միջեւ ուղիղ թռիչքների կազմակերպմամբ:
Այս մասին Ազգային ժողովի նիստին «Հայաստանի Հանրապետության կառավարության և Հորդանանի Հաշիմյան Թագավորության կառավարության միջեւ օդային հաղորդակցության վերաբերյալ» համաձայնագրի վավերացման հարցի քննարկման ժամանակ, պատասխանելով պատգամավորների հարցերին, ասաց ՀՀ Քաղավիացիայի կոմիտեի ղեկավար Տաթևիկ Ռեւազյանը:
Բայց, ըստ նրա, սա ամենեւին չի նշանակում, որ այս հարցը կարգավորման կարիք չունի: «Այսօր նոր ուղղություններ են սկսել շատ արագ զարգանալ, եւ պարզվում է, որ կան երկրներ, որոնց հետ մենք ընդհանրապես որեւէ պայմանագրեր չունեինք, եւ դա խոչընդոտներ կստեղծեր, եթե այս իրավիճակն այդպես էլ չկարգավորեինք»,- հավելեց պաշտոնյան:
Ռեւազյանը դժվարացավ ասել` սկզբունքորեն հնարավո՞ր է արդյոք կազմակերպել թռիչքները դեպի Հորդանան, քանի որ, ինչպես նա խոստովանեց, այսօր բազմաթիվ տարբեր տեսակի խոչընդոտներ կան, սակայն տարանցման միջոցով, որոշակի սահմանափակումներով, բայց, այնուամենայնիվ, դա հնարավոր կլինի անել:
