ԱՄՆ պետքարտուղար Մայք Պոմպեոն աշխարհում Արեւմուտքի ազդեցության թեմայով թեժ վեճի է բռնվել եվրոպական գործընկերների հետ եւ հերքել է այն պնդումները, որ Վաշինգտոնը հեռացել է համաշխարհային բեմահարթակից, հայտնում է Associated Press-ը։
Անվտանգության հարցերով Մյունխենյան համաժողովում իր ելույթի ժամանակ Պոմպեոն փորձել է թուլացնել Թրամփի նման անկանխատեսելի նախագահի առկայությամբ ԱՄՆ-ի հետ հարաբերությունների առնչությամբ Եվրոպայի մտահոգությունը՝ հայտարարելով․ «Արեւմուտքը հաղթում է, եւ մենք միասին ենք հաղթում»։
Սակայն պետքարտուղարի այդ պնդմանն անմիջապես առարկել է Ֆրանսիայի նախագահ Էմանուել Մակրոնը՝ հայտարարելով «Արեւմուտքի թուլացման մասին»։
Իր հերթին, իր ելույթի ժամանակ Գերմանիայի նախագահ Ֆրանկ Վալտեր Շտայնմայերը ենթադրել է, որ ԱՄՆ-ը հերքում է «նույնիսկ միջազգային հանրության մասին միտքը» եւ գործում է «իր հարեւանների ու գործընկերների հաշվին»։
Պոմպեոն էլ անմիջապես առարկել է Գերմանիայի նախագահին՝ նշելով․ «Այդ հայտարարությունները չեն արտացոլում իրականությունը»։
«Ես ուրախ եմ հայտնել, որ տրանսատլանտյան դաշինքի մահվան մասին շշուկները խիստ չափազանցված են»,- հավելել է նա՝ վերաձեւակերպելով Մարկ Տվենի ստեղծագործությունից հայտնի մեջբերումը։
Պոմպեոն ընդգծել է, թե Վաշինգտոնը կարեւոր դեր է խաղում Եվրոպայի անվտանգության ապահովման գործում՝ ՆԱՏՕ-ի զորքերի մի մասը Ռուսաստանի հետ սահմանին տեղակայելով, ինչպես նաեւ մասնակցելով ԻՊ-ի դեմ պայքարի միջազգային ջանքերին։
«Մի՞թե Ամերիկան է մերժում միջազգային հանրությանը»,- դիմելով հավաքվածներին՝ տարակուսել է ԱՄՆ պետքարտուղարը։