Հայաստանի նախագահ Սերժ Սարգսյանի հայտարարությունը՝ թափ հաղորդել մարտի 1-ի գործին, հռետորական բազմաթիվ հարցերի տեղիք է տալիս, NEWS.am-ի թղթակցի հետ զրույցում ասաց «Ժառանգություն» կուսակցության պատգամավոր Արմեն Մարտիրոսյանը։
«Օրինակ, հարց է ծագում, ինչո՞ւ հայաստանյան իշխանությունները մարտի 1-ի գործին թափ չէին հաղորդում ավելի շուտ։ Մեկ այլ հարց էլ է ծագում՝ նախագահ Սերժ Սարգսյանի այս հայտարարությունը դեկլարատի՞վ բնույթ է կրում, ինչպես մնացածները, թե՞ իրական հիմքեր ունի»,- նշեց Մարտիրոսյանը։
Նա նաեւ նկատեց, որ Սերժ Սարգսյանի այս հայտարարությունը արժե պայմանավորել ինչպես ԵԽԽՎ մոնիթորինգային խմբի զեկույցով, ըստ որրի 2008 թվականի մարտի 1-ի հանցագործույթյունների չբացահայտվածությունը թունավորում է Հայաստանի մթնոլորտը, այնպես էլ Հայ ազգային կոնգրեսի համապատասխան պահանջներով։
Նշենք, որ նախօրեին կայացած դատաիրավական բարեփոխումների հացերով խորհրդակցության ժամանակ Հայաստանի նախագահ Սերժ Սարգսյանը հայտարարել էր 2008 թվականի մարտի 1-ի իրադարձությունների բացահայտմանը նոր թափ հաղորդելու անհրաժեշտության մասին։ Սերժ Սարգսյանը նաեւ հայտարարել էր, որ մարտի 1-ի դեպքերի բացահայտումն առաջնահերթություն է անձամբ իր համար։