Մարտի 6-ին Երեւանում ներկայացվել են տարածքային զարգացման եւ բարեփոխումների տեխնիկական աջակցության պիլոտային դրամաշնորհային սխեմաների արդյունքները: «Տարածքային զարգացման պիլոտային դրամաշնորհային սխեմա» (PRDP) (2016-2020) ծրագրի ընդհանուր նպատակն է աջակցությունը սոցիալ-տնտեսական արագացված զարգացմանը, Հայաստանի մարզերի եւ Երեւանի կայունության ու կենսունակության բարձրացմանը, փոքր եւ միջին բիզնեսի զարգացմանը, երկրի տնտեսական, սոցիալական եւ տարածքային միասնության սատարմանը: Դրամաշնորհային սխեման բաղկացած է 8 նախագծերից՝ ընդհանուր 10 մլն եվրո արժեքով, որոնք ամբողջ երկրում ստեղծել են 500 նոր աշխատատեղեր:

Դրանից բացի, ներկայացվել են նաեւ «EU4Regions. Հայաստանում տարածքային զարգացման քաղաքականության աջակցություն՝ PRDP» (2018-2020) ծրագրի արդյունքները՝ ուղղված ավելի քան 150 հաստատությունների քաղաքական աջակցության ապահովմանը, ներուժի զարգացմանը եւ երկրի թույլ զարգացած մարզերին դրամաշնորհային սխեմայի ուղիղ տեխնիկական աջակցությանը՝ 31,1 մլն եվրո ընդհանուր գումարով:

Եվս 14 մլն եվրո է տրամադրվել «Տեղական սուբյեկտների ուժեղացում՝ հանուն զարգացման» նախագծի շրջանակում:

Նշված նախագծերով աշխատանքների արդյունքների ամփոփումից հետո ներկայացվել է նաեւ 2019-2025 թվականների համար Հայաստանի տարածքային զարգացման վերանայված ռազմավարությունը:

Հայաստանում Եվրամիության պատվիրակության ղեկավար, դեսպան Անդրեա Վիկտորինը լրագրողների հետ զրույցում ասաց, որ տարածքային զարգացումը, նոր աշխատատեղերի ստեղծումը եւ քաղաքացիների կենսամակարդակի բարձրացումը Եվրամիության եւ Հայաստանի համագործակցության գերակա ուղղություններն են:

«Հավասարաչափ տարածքային զարգացման շրջանակում կարեւոր նշանակություն ունի խոցելի ուղղությունների թիրախային աջակցությունը, նախագծերի իրականացման բյուջեի ռազմավարության մշակումը, սուբյեկտների լայն շրջանակի ներգրավումը»,- նշեց նա:

Նրա խոսքով՝ ԵՄ-ն հաշվի է առել այս ոլորտում ծրագրերի իրականացման փորձը եւ մտադիր է կիրառել ավելի արդյունավետ գործիքներ ու մեխանիզմներ: