Եվրախորհրդի խորհրդարանական վեհաժողովի (ԵԽԽՎ) Մոնիտորինգի հանձնաժողովում հոկտեմբերի 1-ին լսվել է Հայաստանի պարտավորությունների կատարման վերաբերյալ հարցը:
ԵԽԽՎ-ում հայաստանյան խորհրդարանական պատվիրակության ղեկավար Դավիթ Հարությունյանը հանձնաժողովի նիստի ավարտից անմիջապես հետո «Ազատություն» ռ/կ-ին հայտնել է, որ Հայաստանի հարցը ԵԽԽՎ-ի լիագումար նստաշրջանի օրակարգ մտցնելու մասին որոշում չի կայացվել, թեեւ քննարկման ընթացքում որոշակի առաջարկներ պարտավորությունների կատարման առնչությամբ արվել են:
Հանձնաժողովում նախ ներկայացվել է, թե առ այս փուլը ինչ աշխատանքներ են կատարել Հայաստանի իշխանությունները: Հարցի քննարկման ընթացքում էլ հանձնաժողովն ընդգծել է այն բոլոր առաջնահերթ խնդիրները, որոնց շարունակելու է հետեւել: «Մասնավորապես, ոստիկանության ռեֆորմը եւ ընտրական ռեֆորմը՝ օրենսդրության փոփոխությունը մասնավորապես, եւ ռադիոյի, հեռուստատեսության հետ որոշակի անելիքներ կան, ընդհանուր առմամբ` այն բոլոր բարեփոխումները, որոնք սպասում են մեզանից՝ ըստ բանաձեւի»,- նշել է Հարությունյանը եւ հավելել, որ հանձնաժողովում չի քննարկվել 2008 թվականի մարտի 1-2-ի իարադարձություններն ուսումնասիրող խորհրդարանական ժամանակավոր հանձնաժողովի զեկույցը, որովհետեւ այն դեռեւս թարգմանված չէ, սակայն զեկույցին անդրադառնալու են Մոնիտորինգի հանձնաժողովի մոտակա նիստերից մեկում: Ըստ Հարությունյանի՝ Մոնիտորինգի հանձնաժողովը ոստիկանության գործողությունների վիճարկման հետ կապված անկախ մարմին ձեւավորելու հարց է բարձրացրել: