Համաձայնագրով սահմանվում է ԵԱՏՄ անդամ երկրների ներքին ջրային ուղիներով նավագնացության կարգը: Այս մասին ՀՀ Ազգային ժողովի նիստին ԵԱՏՄ անդամ երկրների միջեւ «Նավագնացության մասին» Համաձայնագրի վավերացման հարցի քննարկման ժամանակ հայտարարել է ՀՀ տարածքային կառավարման եւ ենթակառուցվածքների փոխնախարարի Արմեն Սիմոնյանը:
Նա, մասնավորապես, նշել է, որ «Նավագնացության մասին» Համաձայնագիրը ստորագրվել է ԵԱՏՄ անդամ երկրների կառավարությունների միջեւ 2019 թվականի փետրվարի 1-ին Ալմաթիում կայացած Եվրասիական միջկառավարական խորհրդի նիստի ընթացքում:
Համաձայնագիրը կոչված է թեթեւացնելու ԵԱՏՄ անդամ պետությունների դրոշի ներքո նավարկող նավերի մուտքն անդամ երկրների ներքին ջրային ուղիներ, ինչպես նաեւ` պարզեցնելու երկկողմանի եւ տարանցիկ բեռների, ուղեւորների, ուղեբեռների փոխադրումն ու նավերի բուքսումը»,- պարզաբանել է Սիմոնյանը` հավելելով, որ Համաձայնագրի կարեւոր մասը նավերի փաստաթղթերի եւ դրանց անձնակազմի փոխադարձ ճանաչումն է ԵԱՏՄ անդամ պետություններում: Համաձայնագրով սահմանվում են նաեւ ԵԱՏՄ անդամ երկրների ներքին ջրային ուղիներով նավագնացության մեխանիզմներ, ընթացակարգեր եւ պայմաններ: