Ակնհայտ է, որ Արցախում արդեն ուժեր են նկատվում, որոնք կփորձեն ապակայունացնել իրավիճակն այնտեղ, բայց արցախցիները երբեք չեն աջակցի նման գործընթացներին, քանի որ շատ լավ գիտեն անվտանգության գինին: Այս մասին մարտի 27-ին լրագրողների հետ հանդիպման ժամանակ հայտարարեց «Ռեֆորմիստներ» կուսակցության նախագահ Վահան Բաբայանը:
Նրա խոսքով, ընդհանուր առմամբ, տարօրինակ կլինի, եթե արցախցիներն իրենց ձայները չտան պատերազմի միջով անցած մարդուն: Նա շեշտեց Արցախում արտակարգ դրության անհրաժեշտությունը: «Հայաստանի իշխանությունները նույնպես համառորեն չէին ցանկանում չեղարկել քարոզարշավը, մինչեւ չհասկացան, որ անգործությունը կարող է աղետի պատճառ դառնալ: Արցախի նախագահ Բակո Սահակյանը, ըստ երևույթին, քաղաքական կայունություն է ցանկանում պահպանել ընտրությունների նախաշեմին, սակայն բոլոր անհրաժեշտ որոշումները` արտակարգ դրություն հայտարարելը եւ ընտրապայքարը հետաձգելը, պետք է բխեն անվտանգության նկատառումներից, այդ թվում նաեւ` ռազմական»,- հավելեց Վահան Բաբայանը:
Նա նաեւ նշեց Հայաստանի կարեւոր դերը Արցախի անվտանգության ապահովման գործում, այդ թվում` համաճարակաբանական անվտանգության: «Հունվարից Հայաստանում կորոնավիրուսի տարածումը կանխելու ուղղությամբ իրականացվող աշխատանքները համակարգող հանձնաժողով է գործում, որը, սակայն, այս ընթացքում ոչ մի անգամ հանդես չի եկել Ղարաբաղում համապատասխան բժշկական կենտրոն կառուցելու նախաձեռնությամբ Արցախում կորոնավիրուսի բռնկման վտանգի ֆոնին»,- եզրափակեց կուսակցության նախագահը:
Նշենք, որ Հայաստանում մարտի 16-ից ապրիլի 14-ը արտակարգ դրություն է հայտարարվել: Մարտի 31-ին Արցախում նախագահական եւ խորհրդարանական ընտրություններ կանցկացվեն: