Փենսիլվանիայում բնակվող Ռոբերտ Բուշը բնության մեջ շատ ժամանակ է անցկացնում եւ հրապուրված է լուսանկարչությամբ: Նա մի անգամ ուշադրություն է դարձրել, որ առվակի վրա ընկած գերանը այն անցնելու հարմար կամուրջ է դարձել, եւ ափին ֆոտոծուղակ է տեղադրել: Պարզվել է, որ գիշեր-ցերեկ գերանի մոտ են գալիս ամենատարբեր գազաններ, փոխանցում է Nat-geo-ն:
Կադրի մեջ են հայտնվել ահռելի քանակությամբ անտառի բնակիչներ՝ պստլիկ արագաշարժ սկյուռներից մինչեւ ծանրքաշային սեւ արջ՝ քոթոթներով: Մի անգամ արջն անգամ սայթաքել է գերանի վրա, բայց հավասարակշռությունը չի կորցրել եւ մի թաթից մյուսի վրա երերալով անցել է մյուս ափ: Առվակը կամրջով անցել են նաեւ ջրարջեր, լուսաններ, ձկնկուլներ, բադեր, ջրաքիսներ, մացառախոզեր եւ այլ գազաններ:
