Մենք կգործենք իրավիճակին համապատասխան, զարգացումներին համապատասխան. այս պահի դրությամբ երեկ ես ստորագրել եմ 4 որոշում: Այս մասին, այսօր՝ ապրիլի 14-ին Արցախում նախագահական ընտրությունների քվեարկությանը մասնակցելուց հետո լրագրողների հետ զրույցում նշեց Արցախի պետ նախարար Գրիգորի Մարտիրոսյանը:
«Առաջինը վերաբերում էր Արցախ մուտքի նկատմամբ սահմանափակումների կիրառմանը, մնացածը հիմնականում վերաբերում էին ներքին կյանքին: Այն բոլոր սահմանափակումները, որ հիմա կան Հայաստանում, մենք կկիրառենք Արցախում աստիճանաբար՝ ըստ անհրաժեշտության»,-ասաց պետնախարարը:
Հարցին, թե հայկական իրականությունում մեկ մարդու համար փոխում են Սահմանադրությունը, բայց երբ ամբողջ ժողովրդի առողջության է վերաբերում, Արցախի իշխանությունները վկայակոչում են Սահմանադրությունն ու հայտարարում, որ չեն կարող հետաձգել ընտրությունները, Գրիգորի Մարտիրոսյանը պատասխանեց. «Սահմանադրություն փոխելը ենթադրում է հանրաքվե, դրանով ամեն ինչ ասված է, քանի որ ընտրություն, թե հանրաքվե, դա նույն ընթացակարգն է նախատեսում»:
