Հայ-իրանական ծրագրերը չեն սառեցվել, եւ այժմ տարվում են նախապատրաստական աշխատանքներ՝ «Իրան-Հայաստան» էլեկտրահաղորդման 400 կիլովոլտանոց երրորդ բարձրավոլտ գծի շինարարական նախագծի շրջանակներում Հայաստան 60 մարդ ուղարկելու համար։ Այս մասին ապրիլի 27-ին տարածաշրջանում կորոնավիրուսի ազդեցության վերաբերյալ քննարկման շրջանակներում հայտարարեց Իրանում Հայաստանի արտակարգ եւ լիազոր դեսպան Արտաշես Թումանյանը։ Նա պարզաբանեց, որ տրամադրություններն այդ հարցում Իրանում դրական են։ Նրա խոսքերով՝ Իրանից բեռնափոխադրումների ծավալը, կորոնավիրուսի տարածման հետ կապված, համարյա չի փոխվել, մի քիչ փոխվել են Հայաստանից ԻԻՀ արտահանման ցուցանիշները։
Դեսպանը մեծ փոփոխություններ է կանխատեսում Իրանի ներքին կյանքում, ինչը կարող է ուղեկցվել ներքին պետական պարտքի մեծացումով եւ սեփականաշնորհման աճով։
«Արտաքին քաղաքականության մեջ նույնպես Եվրոպայի հետ հարաբերություններում տրանսֆորմացիա է դիտարկվում, իսկ ԱՄՆ-ի հետ հարաբերություններում հանդուրժողականության որոշ նշաններ են ի հայտ գալիս։ Հայաստանը պետք է պատրաստ լինի հնարավոր աշխարհաքաղաքական փոփոխությունների»,- նշեց Արտաշես Թումանյանը։
