Բելառուսի Իվացեւիչի քաղաքի №5 ուղղիչ-աշխատանքային գաղութում պատիժը կրելուց հետո ազատվել է նախկին «օրենքով գող», 38-ամյա Պավել Ալեքսեեւիչը, որը քրեական շրջանակներում հայտնի է որպես Պաշտետ, հայտնում է «Պրայմ Կրայմ» գործակալությունը:
Պաշտետին անվանում են Բելառուսի քրեականների առաջնորդի թեկնածու. նա կարող է դառնալ երկրի գլխավոր «օրենքով գող» Ալեքսանդր Կուշներովի (Սաշա Կուշներ) մրցակիցը: Ճիշտ է, ինչպես նշում է գործակալությունը, Պաշտետը հանցավոր աշխարհում չի համարվում «սուր մտքի տեր» մարդ:
Ծագումով Մինսկից, նախկին «օրենքով գող» Ալեքսեեւիչը դատվել է 5 անգամ. Բելառուսում՝ խուլիգանության եւ երկու անգամ՝ ավազակության մեղադրանքներով, ինչպես նաեւ Ռուսաստանում՝ թմրանյութերի եւ սահմանի ապօրինի հատման համար: Պաշտետն իր գողական տիտղոսը ստացել է 2012 թվականի դեկտեմբերին Դուբայում (ԱՄԷ). նրան թագադրել են վրացական գողական կլանի ներկայացուցիչները՝ Տարիել Օնիանիի (Տարո) եւ Մեհրաբ Ջանգվելաձեի (Սուխումսկի) գլխավորությամբ:
Կլանի առաջնորդների մտահղացմամբ՝ Պաշտետն արդեն այդ ժամանակ պետք է մրցակցեր Սաշա Կուշների՝ Ռուսաստանի հանցավոր աշխարհի առաջնորդ Ասլան Ուսոյանի (Դեդ Հասան) բելառուսցի դրածոյի հետ: Սակայն արդեն 2013 թվականի հունվարին մի ամբողջ շարք «օրենքով գողերի» որոշմամբ Պաշտետին գողական տիտղոսից զրկել էին Զելոնագրադի քննչական մեկուսարանում: