Պետական գնումների համակարգում մենք մտցրել ենք պարտադիր բանկային երաշխիքի առկայության համակարգ եւ այդ համակարգը կապվում է տեխնիկական վերահսկողության հետ: Այս մասին այսօր՝ մայիսի 27-ին, կառավարության նիստում հայտարարեց ՀՀ վարչապետ Նիկոլ Փաշինյանը:
Նրա խոսքով, բոլոր կապիտալ շինարարությունները պետք է զուգորդվեն տեխնիկական հսկողությամբ. «Երկար տարիներ տեխնիկական վերահսկողությունն ուներ ֆիկտիվ բնույթ: Այդ վերահսկողությունն ընդամենը հովանոց էր դառնում կապալառուին ապօրինի շինարարություն անելու համար: Այս թեման բացվել է մեկ տարի առաջ անորակ շինարարությունների հետ կապված: Ես հիշում եմ մի դեպք, երբ Երեւանում գրանցված մի կազմակերպություն տեխնիկական վերահսկողության մրցույթը, որ պետք է տեղի ունենար Մեղրիում, շահել էր 37 հազար դրամով:
Սա նշանակում է, որ հսկողություն չի իրականացվելու, կապալառուն պայմանավորվել է այդ տեխնիկական վերահսկողի հետ, որ իր փայը կտա, եւ նա թղթերը կստորագրի»,-ասաց Փաշինյանը:
Նա հավելեց, որ նորմատիվներով տեխնիկական վերահսկողության համար այնպիսի ցածր արժեք էր սահմանվել՝ երկու տոկոս, որ տեխնիկական վերահսկողությունը որպես շահութաբեր ոլորտ, ոչ մեկին հետաքրքիր չէր: «Հիմա ազատականացվում են տեխնիկական վերահսկողության գները, որպեսզի մարդիկ շահագրգիռ լինեն իրականում իրականացնել տեխնիկական վերահսկողություն, դրանից ակնկալել կոնկրետ շահույթներ»,-ասաց վարչապետը: