ԲՀԿ-ի կողմից քննադատությունները եւ կառավարության հրաժարականի պահանջը ես շատ իրավաչափ եմ համարում բացառությամբ մի նյուանսի. Համավարակի այս սպառնալիքի ու արտակարգ դրության պայմաններում նման պահանջ ներկայացնելը ինձ համար անհասկանալի է: Այս մասին այսօր՝ հունիսի 10-ին, ԱԺ-ում լրագրողների հետ զրույցում նշեց Կոտայքի մարզպետ Ռոմանոս Պետրոսյանը:
«Ընկալելի կլիներ, եթե առարկայական, թիրախային քննադատություն հնչեր, կոնկրետ ծրագրային այլընտարքներ առաջարկվեին: Ես ԲՀԿ-ի 7 առաջարկներին շատ լավ ծանոթ եմ, դրանք կենացներից այն կողմ չեն անցել: Այո, ես էլ եմ ուզում, որ երկիրն ավելի բարգավաճ լինի, թոշակները բազմապատկվեն, հարկային մուտքերն ավելանան: Իսկ հնչեցնողներն ովքե՞ր են: Տվյալ ուժը մի քանի անգամ քաղաքական կոալիցիոն ղեկավարում է իրականացրել:
Խնդրում եմ ԲՀԿ-ի պատասխանատուներին իրենց կոալիցիոն շրջանի 2-3 ձեռքբերումներ մատնացույց անեն: Սոցիալական ոլորտ են կառավարել, առողջապահության ոլորտ են կառավարել: Այո, իրենք կիսել են պատասխանատվությունը, բայց կարծես թե միշտ պատասխանատուն եղել է ՀՀԿ-ն ու Սերժ Սարգսյանը: Ինձ համար պատասխանատու են բոլոր այն կուսակցությունները, որոնք այդ շրջանում գտնվել են կառավարության կազմում, այդ թվում ՀՀԿ-ն, ԲՀԿ-ն, ՕԵԿ-ը, ՀՅԴ-ն»,-ասաց Ռոմանոս Պետրոսյանը: