Իմ նշանակումից հետո Կոտայքի մարզում կոռուպցիոն բնույթի շուրջ 40 քրեական գործեր են հարուցվել, որոնցով անցնում են բազմաթիվ նախկին ու գործող համայնքի ղեկավարներ, դպրոցի տնօրեններ: Այս մասին այսօր՝ հունիսի 10-ին, ԱԺ-ում լրագրողների հետ զրույցում նշեց Կոտայքի մարզպետ Ռոմանոս Պետրոսյանը:
«Նրանց մի մասը սերտ համագործակցության մեջ է գտնվել եւ գտնվում ԲՀԿ-ի հետ»,-ասաց նա:
Դիտարկմանը, թե վերջերս լուր տարածվեց, որ Հրազդանի ԲԿ-ում զենքով անձ է մտել, մարզպետն ասաց, որ առաջին անգամ է դրա մասին լսում. «Վերջին 2 տարում «Հրազդան» ԲԿ-ում երկու տնօրեն է փոխվել եւ երկուսի մասով էլ հարուցված քրեական գործեր կան: Խոսքը մի քանի տասնյակ մլն դրամների առերեւույթ յուրացումների մասին է: Յուրաքանչյուր տնօրեն հեռանալով նաեւ իր հետ տանելով իրեն սերտաճած անձանց, որոնք այդ վիճակին են հասցնում ԲԿ-ն, բնականաբար, փորձ են անելու սեւացնելու հաջորդ տնօրենին: Բուժկենտրոնը նորմալ աշխատում է, վերջին շրջանում բավականին ծանրաբեռնված է, քանի որ Հրազդանից բավականին մեծ թվով վարակակիրներ ունեցանք»:
