ՌԴ կառավարության օրինագծային գործունեության հարցերով հանձնաժողովը հավանություն է տվել օրինագծին, որը գինեգործության մասին օրենսդրությունը համապատասխանեցնում է ԵՏՄ տեխկանոնակարգին: Հանձնաժողովի պատրաստած կառավարության արձագանքի նախագիծը ՏԱՍՍ-ի տրամադրության տակ է:
Խոսքն օրինագծի մասին է, որի հեղինակներն են Պետական դումայի փոխխոսնակ Ալեքսեյ Գորդեեւը («Եդինայա Ռոսիա») եւ Դումայի ագրարային հարցերով կոմիտեի ղեկավար Վլադիմիր Կիշինը (ՌԴ Կոմունիստական կուսակցություն): Նախագիծը խաղողագործության եւ գինեգործության վերաբերյալ ռուսական օրենսդրությունը համապատասխանեցնում է Եվրասիական տնտեսական միության «Ալկոհոլային արտադրանքի անվտանգության մասին» տեխնիկական կանոնակարգին (ուժի մեջ է մտնում 2021 թվականի հունվարի 9-ից), ինչպես նաեւ միջազգային ակտերին ու Եվրամիության ստանդարտներին, որոնցում գինեգործական արտադրանքին ներկայացվող տարբեր պահանջներ ու բնութագրեր կան:
Նախագիծը մասնավորապես «պաշտպանված աշխարհագրական նշումով գինի» հասկացությունը լրացնում է դրույթով, որ այն պատրաստվում է ոչ միայն որոշակի խաղողագործական-գինեգործական գոտու սահմաններում աճեցված խաղողից, այլեւ որոշակի խաղողագործական-գինեգործական շրջանում:
Օրինագծի համաձայն՝ գինեգործության մասին նախկինում ընդունված օրենքի դրույթները չեն կիրառվի մինչեւ օրենքի ուժի մեջ մտնելը թողարկված գինեգործական արտադրանքի շրջանառության վրա: Միաժամանակ գինու պահվող նյութի համար նախատեսվելու է անժամկետ պահում՝ արտադրության մեջ դրանց հետագա օգտագործման համար, որը կարող է իրականացվել մինչեւ օրենքի ուժի մեջ մտնելը գործող կանոնների համաձայն: Դրանից բացի, օրինագծով առաջարկվում է անցկացնել գինու հումքի եւ գինեգործական արտադրանքի մեկանգամյա գույքագրում, որոնք գտնվում են գինեգործական ձեռնարկությունների տարածքում եւ նրանց են պատկանում սեփականության իրավունքով՝ նշելով դրանց ծավալը միասնական պետական ավտոմատացված տեղեկատվական համակարգում:
Օրինագծով նաեւ առաջարկվում է ընդլայնել խաղողագործության եւ գինեգործության սուբյեկտներին խթանելու մի շարք միջոցառումներ:
«Նշված փոփոխությունները կպահանջեն դաշնային բյուջեի լրացուցիչ ծախսեր: Ընդ որում՝ օրինագծի ֆինանսատնտեսական հիմնավորման մեջ հաշվարկներն ու հիմնավորումները, ինչպես նաեւ այդ միջոցառումների ֆինանսավորման աղբյուրները նշված չեն»,- նշված է օրինագծին կառավարության արձագանքի նախագծի մեջ: Սրա հետ կապված՝ հանձնաժողովը նշում է, որ կառավարությունն օրինագծին աջակցում է այն վերջնամշակելու պայմանով:
