Սեւանի ոստիկանության բաժինը շարունակում է հետաքննությունը Սեւանի թեակղզու հատվածում բնապահպանության նախարարի հրահանգով ծառերի զանգվածային հատման կապակցությամբ։

Ինչպես NEWS.am-ը տեղեկանում է «Իրավական պետություն» քաղաքացիական նախաձեռնությունից, Բնապահպանության նախարարը մայիսի 11-ի առավոտյան անձամբ ժամանել է ծառահատվող տարածք եւ բացատրություն տվել ոստիկանության աշխատակիցներին, ովքեր վարում են հետաքննությունը։ Նախարարը հաստատել է, որ ծառահատումը կատարվում է իր հրամանով եւ տեղում հրահանգել է սկսել հանրային լողափի շինարարական աշխատանքները։ Ներկա դրությամբ պարզ չէ, թե բնաապահպանության նախարարությունն ունի՞ արդյոք շինարարական աշխատանքների համար օրենքով սահմանված եւ փորձաքննություն անցած նախագծային փաստաթղթեր եւ շինարարական թույլտվություն։

Ավելի վաղ NEWS.am-ը հայտնել էր, որ ըստ Բնախահպանության նախարարության, Սեւանի թերակղզում ոչ թե ապօրինի ծառահատում է եղել, այլ ջրածածկման ենթակա տարածքների օրինական մաքրում:

Հիշեցնենք, որ մամուլում հաղորդագրություն էր տարածվել, որ մայիսի 8-ին Սեւան քաղաքի ոստիկանության աշխատակիցները կանխել են թերակղզում ապօրինի զանգվածային ծառահատումը: Քաղաքացիների դիմումի հիման վրա ժամանած ոստիկանության աշխատակիցներին պարզաբանվել է կատարվող աշխատանքների օրինականությունը, եւ աշխատանքները ոչ միայն չեն կասեցվել, այլեւ շարունակվում են: