Քննությունն ընտրված նյութեր է ներկայացրել դատարան: Այս մասին դատական նիստին հայտարարել է Հայաստանի երկրորդ նախագահ Ռոբերտ Քոչարյանը:
Պետության նախկին ղեկավարը նշել է, որ իր կողմից 2008 թվականի փետրվարի 23-ին հրավիրված որհրդակցությունը «Երկրապահ» միությունում տեղի ունեցող գործընթացների հետեւանքն էր: Սակայն գործում չկա ոչ մի նյութ կամավորների միությունում տեղի ունեցածի վերաբերյալ: «Այսինքն, կան նյութեր դրա հետեւանքների մասին, բայց պատճառները չկան: Ինչպե՞ս հավատալ, որ նման նյութեր ընդհանրապես չկան: Եթե չեմ սխալվում, ԱԱԾ-ից գործի 80 հատորում ընդամենը, եթե չեմ սխալվում, երեք նամակ է: Դուք հավատու՞մ եք, որ նման հանգամանքներում ԱԱԾ-ում փաստաթղթեր չկային»,- հարցրեց Քոչարյանը: Նրա խոսքով` փետրվարի 24-ով թվագրված մեկ նամակ վերաբերում է կատարվածի փաստով քրեական գործ հարուցելուն, երկրորդ նամակը` մարտի 2-ով` գործը դատախազություն տեղափոխելու մասին: «Դուք փաստեր էիք ուզում, ես դրանք ձեզ եմ ներկայացնում, դրանք շատ են: Կարող եմ շարունակել: Երբ մեկը հարցաքննում է, իսկ մյուսը, ով նրա հետ էր` ոչ: Առաջինի ցուցմունքը կա, երկրորդինը` ոչ: Այսինքն ՝ հավաքել են այն նյութերը, որոնք ցանկանում էին ներկայացնել այս գործում»,- ամփոփեց նախկին նախագահը:
