Հակառակորդը վաղ առավոտյան լայնամասշտաբ հարձակում է սկսել մեր հայրենիքի Արցախի հատվածի ուղղությամբ, այդ պահից դիմել ենք մեր բոլոր միջազգային գործընկերներին, որոշ հայտարարություններ կան, որոշները սպասվում են, բայց այս պահին ամեն ինչ որոշվում է մարտադաշտում, դիվանագիտությունը եւ քաղաքականությունը պետք է ամրապնդեն մարտադաշտում տեղի ունեցողը, քանի որ դրանք չեն կարողացել կանխել պատերազմը։ Այս մասին լրագրողների հետ զրույցում ասել է   ԱԺ «Լուսավոր Հայաստան» խմբակցության ղեկավար Էդմոն Մարուքյանը։ 

«Կառավարությունը ռազմական դրություն է հայտարարել, այժմ ԱԺ-ն, իրավունքի ուժով, նիստ է գումարելու, զեկուցողը վարչապետն է կամ նրա ներկայացուցիչը, կան հարցեր, ամեն խմբակցություն կարող է երկու ելույթ ունենալ։ Ազգային ժողովը, կարծում եմ, հայտարարություն կընդունի, ինչի մասին հավելյալ կտեղեկացնենք։ Բոլոր քաղաքական ուժերը առավոտից հայտարարում են, որ բոլոր տարաձայնությունները մի կողմ են դնում, այդ հայտարարությունը նույնպես շուտով կտարածվի: Չեմ կարող ասել՝ նիստը բաց է, թե փակ, սպասենք, տեսնենք», ասել է Էդմոն Մարուքյանը, ավելացնելով, որ եթե կարիք լինի զորակոչվելու՝ իրենք պատրաստ են։

Է.Մարուքյանը հիշեցրել է, որ դեռ երեկ առավոտյան թշնամին ներքին եւ արտաքին ճակատում խոսում էր պատերազմի մասին.

«Այսինքն, մարգարե պետք չէ լինել, որ պատերազմ է լինելու։ Վերջին բրիֆինգի ժամանակ ասացի, որ պետք է սկսել բանակցությունները, թե չէ պատերազմ կլինի։ Բանակցություններ չկային եւ պատերազմը սկսվեց։ Հիմա պետք է ամեն ինչ անել, որ մարտադաշտում ամեն ինչ լավ լինի։ Մենք փակ ռեժիմով քննարկում էինք նախաձեռնել, վարչապետը նախընտրեց Հ1-ին հարցազրույց տալ, որը, կարծում եմ, արդեն ժամանակավրեպ է։ Հիմա մենք այլ ռեժիմի մեջ ենք։ Խորհրդարանական երկրում ոչ մի կոնֆիդենցիալ բան չի կարող լինել»։ 

ՀԱՊԿ-ին դիմելու հարցը եւս քննարկվելու է ԱԺ հատուկ նիստում, ասել է Մարուքյանը.

«ՀԱՊԿ ասելով՝ մենք առաջին հերթին հասկանում ենք, որ շարժիչ ուժը  Ռուսաստանն է։ Ամեն բան այս պահին, ՀԱՊԿ-ի մասով, կախված է Ռուսաստանից։ Եթե կարիք լինի, որ պաշտոնապես դիմենք ՀԱՊԿ-ին՝ կդիմենք։ Մենք գիտենք, որ Նախիջեւանում էլ կուտակումներ կան, եւ պետք է քննարկենք ու տեսնենք, ամեն դեպքում, Հայաստանի վրա ոտնձգություն լինի, ապա կարող ենք դիմել», ասել է Էդմոն Մարուքյանը։