Համաշխարհային առեւտրի անկումը կորոնավիրուսի համավարակի պատճառով 2020 թվականին, նախորդ տարվա համեմատ, 7-9 տոկոս կկազմի: Այս կանխատեսում է չորեքշաբթի օրը ներկայացրել ՄԱԿ-ի Առեւտրի եւ զարգացման համաժողովը (UNCTAD), փոխանցում է ՏԱՍՍ-ը:
«UNCTAD-ը 2020 թվականին կհամաշխարհային առեւտրի 7-ից 9 տոկոս անկում է կանխատեսում` չնայած երրորդ եռամսյակի վերականգնման նախանշաններին»,- նշվում է կազմակերպության հայտարարության մեջ:
2020 թվականի երրորդ եռամսյակի վերջի տվյալներով` համաշխարհային առեւտուրը նախորդ տարվա նույն ժամանակահատվածի համեմատ հինգ տոկոս անկում է գրանցել: Այս արդյունքը, սակայն, զգալիորեն ավելի լավ է, քան` երկրորդ եռամսյակում, երբ անկումը 19 տոկոսի էր հասել, նշում են փորձագետները: Չորրորդ եռամսյակի նախնական կանխատեսումների համաձայն` համաշխարհային առեւտուրը չի կարողանա դուրս գալ կարմիր գոտուց եւ 3 տոկոսով ցածր կլինի, քան 2019 թվականի չորրորդ եռամսյակում էր:
UNCTAD-ն ուշադրություն է հրավիրում «Չինաստանում առեւտրի ոլորտում ուշագրավ աշխուժության» վրա: «Երկրում արտահանումը, որը համավարակի առաջին ամիսներին ընկել էր, երկրորդ եռամսյակում կայունացել է եւ ուժեղ աճել է երրորդ եռամսյակում»,- ասվում է տեղեկագրում: Փորձագետները Չինաստանի համար 2020 թվականի արդյունքներով առեւտրի տեմպերի 10 տոկոս աճ են կանխատեսում: «Ի տարբերություն մյուս խոշոր տնտեսությունների` չինական ներմուծումը հուլիս եւ օգոստոս ամիսներին կայունացել է եւ սեպտեմբերին աճել է 13 տոկոսով»,- արձանագրում է UNCTAD-ը:
Կորոնավիրուսի դեմ պայքարի հետ կապված բժշկական պարագաների առեւտուրն ապրիլից ի վեր միջինում աճել է ավելի քան 50 տոկոսով: Սակայն, ըստ տեղեկագրի, այս աճից ամենից շատ օգուտ են ստացել մեկ շնչի հաշվով բարձր եկամուտ ունեցող երկրները:
