Հակասահմանադրական եւ հակաօրինական գործընթացների հետեւանքով Սահմանադրական դատարանի նախագահի պաշտոնը զբաղեցնող իմ նախկին գործընկերը, ռազմական դրության պայմաններում կայացրել է ազգի եւ Հայրենիքի համար այս կարեւոր պահի իր բաժին որոշումը՝ ինձ ազատելով Սահմանադրական դատարանի աշխատակազմի ղեկավարի պաշտոնից, ֆեյսբուքյան էջում գրել է ՍԴ աշխատակազմի ղեկավար Էդգար Ղազարյանը:
«Մեկ տարի եւ ինը ամիս բարձր դատարանում իմ աշխատանքը մի մեծ ձեռքբերում էր իմ կյանքում, ինչի համար ես հատուկ շնորհակալություն եմ հայտնում իմ լավ ընկերոջն ու բարեկամին, բազմաշնորհ գիտնական եւ ազնիվ պետական գործիչ, Սահմանադրական դատարանի նախագահ, դոկտոր Հրայր Թովմասյանին։
Սահմանադրական դատարանում իմ աշխատանքը համընկավ մեր պետության, դատաիրավական համակարգի եւ, հատկապես, Սահմանադրական դատարանի համար փորձության ամենաբարդ շրջանի հետ։ Մեկ տարուց ավել է, ինչ Հայաստանի քաղաքական իշխանությունը հնարավոր բոլոր անազնիվ, հակասահմանադրական եւ հակաօրինական միջոցներով, բառի բոլոր իմաստներով հարձակում է գործել Սահմանադրական դատարանի վրա՝ փորձելով իր ապօրինի ազդեցությունը բանեցնել իշխանության այս կարեւոր մարմնի վրա, ինչը մասամբ, ցավոք սրտի, ժամանակավորապես հաջողվել է` բարձր դատարանը մղելով խորը ճգնաժամի մեջ եւ վտանգել սահմանադրական արդարադատության ինստիտուտը մեր երկրում, խարխլելով Հայոց անկախ պետականությունը։
Այս աշխատանքի ընթացքում ես հնարավորություն ունեցա նոր գիտելիքներ եւ հմտություններ ձեռք բերել իրավունքի ոլորտում, ճանաչել ուժեղ եւ թույլ մարդկանց, տեսնել, թե ինչպես են պատասխանատու պահերին իրենց դրսեւորում ազնիվ եւ ստոր մարդիկ, ապրել փորձության եւս մի շրջան, եւ ինքս ինձ համար ապացուցել Ֆերդինանդ Ղազարյանից ինձ ժառանգված՝ սեփական գաղափարներին հավատարմությունն ու սկզբունքայնությունը։ Շնորհակալ եմ բազում գործընկերներին, որոնց հետ աշխատանքը հաճելի էր ինձ համար եւ նաեւ նրանց, որոնք միամտորեն ի ցույց դրեցին իրենց փոքր էությունը՝ մշտապես ինձ հեռացնելով իրենցից ողջ կյանքի համար։
Մենք մեր երկիրն այս վիճակում թողնելու իրավունք եւ ռեսուրս չունենք, պետք է վերստին վերակառուցենք ոչ միայն քանդված Ստեփանակերտը, Շուշին եւ մյուս քաղաքները, այլեւ մեր պետական կառավարման ողջ համակարգը, տնտեսությունն ու հանրային կյանքը։ Առայժմ մեզ պետք է ՀԱՂԹԱՆԱԿ պատերազմում, այնուհետեւ ՀԱՂԹԱՆԱԿ բոլոր ոլորտներում»,- գրել է Էդգար Ղազարյանը:
