Նոյեմբերի 5-ին Արցախի Հանրապետության արտաքին գործերի նախարար Մասիս Մայիլյանը հանդիպում է ունեցել Իսպանիայի Պատգամավորների Կոնգրեսի (ընտրված Բասկերի Երկրից) պատգամավոր Ջոն Ինյարիտուի հետ, տեղեկացնում է Արցախի ԱԳՆ մամուլի ծառայությունը։
ԱԳՆ ղեկավարը ողջունել է իսպանացի պատգամավորին եւ երախտագիտություն հայտնել Արցախի Հանրապետության դեմ Ադրբեջանի եւ Թուրքիայի կողմից սանձազերծված ռազմական ագրեսիայի առաջին իսկ օրերից Արցախին ցուցաբերված քաղաքական աջակցության համար։
Մասիս Մայիլյանը բարձր է գնահատել Բասկերի Երկրի հետ ձեւավորված բարեկամական հարաբերությունները, որոնց համար ամուր հիմք են հանդիսացել 2014 թ. երկրամասի խորհրդարանի կողմից Արցախի ժողովրդի ինքնորոշման իրավունքը սատարող բանաձեւի ընդունումը, ինչպես նաեւ մայրաքաղաք Ստեփանակերտի եւ Դոնոստիայիա միջեւ ապակենտրոնացված համագործակցության հաստատումը։
Ջոն Ինյարիտուն, իր հերթին, նշել է, որ Արցախ այցելության նպատակն է եւս մեկ անգամ իր աջակցությունն ու համերաշխությունը հայտնել Արցախին ու նրա ժողովրդին եւ անձամբ ծանոթանալ ներկայումս հանրապետությունում տիրող իրավիճակին ու նրա դեմ սանձազերծված ագրեսիայի հետեւանքներին։
Պատգամավորի խնդրանքով Մասիս Մայիլյանը ներկայացրել է Արցախի Հանրապետության դեմ զինված ագրեսիայի արդյունքում ստեղծված իրադրությունը։ ԱԳՆ ղեկավարն ընդգծել է, որ այսօր Արցախը, փաստորեն, պայքարում է ոչ միայն Ադրբեջանի եւ Թուրքիայի, այլեւ միջազգային ահաբեկչության դեմ։
Մասիս Մայիլյանը նշել է, որ այս պայմաններում միջազգային հանրությունը պետք է վճռական քայլեր ձեռնարկի՝ կասեցնելու Արցախի դեմ պատերազմական գործողությունները՝ որպես ամենաարդյունավետ միջոց շեշտելով Արցախի Հանրապետության անկախության միջազգային ճանաչումը։
Արտաքին գործերի նախարարը հավելել է, որ Արցախը նաեւ կարիք ունի մասնագիտացված միջազգային մարդասիրական կառույցների ներգրավվածության՝ հաղթահարելու պատերազմի արդյունքում հանրապետությունում ստեղծված ծանր մարդասիրական իրավիճակը։
Ջոն Ինյարիտուն վստահեցրել է, որ կշարունակի իր հետեւողական գործունեությունը՝ Իսպանիայի օրենսդիր մարմնում եւ Եվրոպական խորհրդարանում՝ իրազեկելու Արցախի դեմ Ադրբեջանի, Թուրքիայի եւ միջազգային ահաբեկիչների կողմից իրականացվող պատերազմական հանցագործությունների վերաբերյալ։ Նա նաեւ նշել է, որ ջանքեր կգործադրի իր երկրի կողմից Արցախի ժողովրդին աջակցություն ապահովելու հարցում։
