Նիկոլ Փաշինյանը նախկինի պես փորձում է ազդել դատավորների վրա, ինչը քաղաքակիրթ երկրում անթույլատրելի է։ Այս մասին դեկտեմբերի 1-ին լրագրողների հետ զրույցում ասաց երկրորդ նախագահի փաստաբան Հայկ Ալումյանը՝ պատասխանելավ այն հարցին, թե ինչպես է գնահատում վարչապետի երեկվա հանդիպումը Բարձրագույն դատական խորհրդի անդամների եւ մի քանի օր առաջ տեղի ունեցած հանդիպումը դատավորների հետ։
«Ոչ մի նորմալ երկրում չի կարելի զանգով դատավորներին հավաքել, իսկ նրանց արժանապատվությունը պետք է բավարարի, որ երկրի ղեկավարից ցուցումներ չընդունեն՝ ով էլ նա լինի տվյալ պահին»,- ասաց Ալումյանը՝ հավելելով, որ հանդիպմանը հրավիրվել են հենց այն դատավորները, որոնք մերժել են մի շարք անձանց կալանավորելու մասին դատախազության միջնորդությունները, ինչպես նաեւ նրանք, ովքեր չեղարկել են ռազմական դրության պայմաններում ցույցերի եւ հավաքների արգելքը։
Նրա խոսքով՝ իրենք արդեն Եվրադատարան բողոքներ են ներկայացրել, որ գործադիր իշխանությունը դատարանների վրա ճնշում է գործադրում․ «Մենք բերել ենք դատարանների շենքերի արգելափակման փաստերը եւ շատ այլ բաներ ենք նշել։ Հիմա մենք տեսնում ենք այդպիսի միջամտության նոր, ակնհայտ փաստեր։ Վարչապետն, ասես, հատուկ մեզ ապացույցներ է տալիս, որպեսզի մենք այդ գործը շահենք։ Ես անգամ կեսկատակ-կեսլուրջ առաջարկում եմ նրան հետ փոխհատուցումը կիսել, որը կստանանք ՄԻԵԴ որոշմամբ»։
