Երկուշաբթի եվրոպական խոշոր ֆոնդային շուկաներն աճում են եվրոգոտում արդյունաբերական արտադրության տվյալների եւ Մեծ Բրիտանիայի եւ Եվրամիության (ԵՄ) միջեւ բանակցությունների երկարացման մասին լուրերի ֆոնին, վկայում են աճուրդների տվյալները, փոխանցում է «Փրայմ»-ը:
Բրիտանական FTSE 100 ինդեքսն աճել է 0.31 տոկոսով` հասնելով 6567.43 կետի, ֆրանսիական CAC 40 ինդեքսը` 0.88 տոկոսով` մինչեւ 5555.93 կետ, գերմանական DAX-ը` 0.98 տոկոսով` մինչեւ 13243.25 կետ:
Երկուշաբթի եվրոպական ցուցանիշներին աջակցում է եվրոգոտու վիճակագրությունը: Այդպես, եվրագոտում արդյունաբերական արտադրության ծավալը հոկտեմբերին ամսական կտրվածքով աճել է 2.1 տոկոսով, իսկ տարեկան կտրվածքովնվազել 3.8 տոկոսով: Ընդ որում, ակնկալվում էր, որ ամսական կտրվածքով ցուցանիշն աճել է 2 տոկոսով, իսկ տարեկան կտրվածքով` 4.4 տոկոսով:
Աճուրդների մասնակիցները շարունակում են հետեւել Միացյալ Թագավորության եւ ԵՄ-ի բանակցությունների հետ կապված նորություններին: Կողմերը հայտնել են, որ առեւտրային համաձայնագրի շուրջ բանակցությունները կշարունակվեն, կողմերը մինչեւ վերջ փոխզիջում կփնտրեն: Ավելի վաղ կողմերը պայմանավորվել էին առեւտրային գործարքի ապագայի վերաբերյալ որոշումը կայացնել դեկտեմբերի 13-ին:
«Թվում է` որոշակի առաջընթաց արդեն գրանցվել է, եւ, հաշվի առնելով, որ կողմերից ոչ մեկը չի ցանկանում խզել բանակցությունները, դա, ամենայն հավանականությամբ, վերջին րոպեին փոխզիջմանը հասնելու ամենահավանական տարբերակն է: Ի վերջո, սա բանակցություններ են, եւ այս փուլում, բացելով սեփական խաղաքարտերը, ոչ մի բանի հասնել հնարավոր չէ»,- Reuters-ը մեջբերում է Oanda-ի վերլուծաբան Քրեյգ Էրլամի խոսքերը:
Ներդրողները լավատեսորեն են արձագանքում նաեւ տարածաշրջանում պատվաստումների հավանական մոտալուտ մեկնարկի մասին լուրերին: Ավելի վաղ Գերմանիայի կանցլեր Անգելա Մերկելը եւս հայտարարել էր, որ Գերմանիայում եւ Եվրամիությունում կորոնավիրուսի դեմ պատվաստումը կսկսվի պատվաստանյութի լիցենզավորումից «մի քանի օր անց», որը կարող է տեղի ունենալ մինչեւ դեկտեմբերի վերջ: Պատվաստումները սկսվել են նաեւ Մեծ Բրիտանիայում: