Չնայած համավարակի կապակցությամբ ճգնաժամին եւ Մոսկվայի նկատմամբ արեւմտյան պատժամիջոցներին՝ Ռուսաստանում գերմանական բիզնեսի ներդրումները շարունակում են գտնվել համեմատաբար բարձր մակարդակի վրա: 2020 թվականի երրորդ եռամսյակում գերմանական ընկերությունները ներդրել են ՌԴ-ում գրեթե 700 միլիոն եվրո, հաղորդում է dpa գործակալությունը: Առաջին երեք եռամսյակների ցուցանիշը կազմել է շուրջ 1.3 միլիարդ եվրո:
Ռուսաստանում գերմանական ձեռնարկությունների ուղիղ ներդրումներն «անսպասելիորեն կտրուկ վերականգնվել են»: Ընկերություններին հաջողվել է փոխհատուցել երկրորդ եռամսյակում ներդրումների անկումը, ինչը կապված էր կորոնավիրուսի համավարակի հետ, հաղորդում է DW-ը:
Նշվում է, որ ՌԴ-ում ներդրումների մակարդակի վրա նաեւ ազդում են ԵՄ պատժամիջոցները, որոնք սահմանվել էին Ղրիմի շուրջ իրավիճակի կապակցությամբ: Միեւնույն ժամանակ գերմանական ընկերությունները Ռուսաստանում տեսնում են խոստումնալից շուկայական ներուժ եւ սպառողունակ 140-միլիոնանոց բնակչություն, ինչպես նաեւ «պետական պարտքի ցածր չափով առողջ պետական բյուջե»:
Հաղորդվում է, որ ներկայում Գերմանիայից ընկերություններն իրագործում են Ռուսաստանում մի քանի խոշոր նախագծեր: Մասնավորապես, Claas գյուղատնտեսական տեխնիկայի արտադրողն ընդլայնում է կոմբայների արտադրությունը Կրասնոդարում: Շինանյութերի գծով մասնագիտակած Knauf ընկերությունը ներդրել է 50 միլիոն եվրո Սանկտ Պետերբուրգի մերձակայքում նոր արտադրական գծի բացման մեջ: Նույնչափ գումար է ներդրել Ռուսաստանում բիզնեսն ընդլայնելու համար Globus հիպերմարկետների ղեկավարությունը:
Ռուս-գերմանական արտաքին առեւտրային պալատի տեղեկություններով՝ ճգնաժամի տարում այն կարողացել է ընդլայնել իր դիրքերը՝ որպես «Ռուսաստանում խոշորագույն օտարերկրյա տնտեսական միավորում»: Այսպես, պալատի անդամների թիվն աճել է ավելի քան 10 տոկոսով՝ ի տարբերություն անցած տարվա շուրջ 1000-ի հետ: Միավորման տվյալներով՝ Ռուսաստանում գրանցված է շուրջ 4000 գերմանական ընկերություն:
