Կա քաղաքական կամք բարձր մակարդակով Թեհրանի եւ Բաքվի միջեւ հարաբերություններն ընդլայնելու համար: Այս մասին հայտարարել է Իրանի նախագահի վարչակազմի ղեկավար Մահմուդ Վայեզին, հաղորդում է «Իռնա»-ն:
Վայեզին Ադրբեջանի վարչապետի տեղակալ Շահին Մուստաֆաեւի հետ հանդիպումը կառուցողական է անվանել եւ նշել. «Նոր իրավիճակ է ձեւավորվել տարածաշրջանում Հայաստանի եւ Ադրբեջանի միջեւ պատերազմի դադարեցումից հետո, ուստի մենք պետք է քննարկենք երկկողմ հարցերը»:
Հանդիպումից հետո նա լրագրողներին հայտնել է, որ ԻԻՀ-ը Ադրբեջանի հետ սահմանը համարում է «խաղաղության եւ բարեկամության» սահման, ինչպես արդեն հայտարարել է Ադրբեջանի նախագահ Իլհամ Ալիեւը:
«Մենք հավատում ենք, որ այսօր պետք է խորացնենք տարածաշրջանի երկրների հետ բարեկամական հարաբերությունները, եւ Իրանի, Ռուսաստանի եւ Ադրբեջանի միջեւ եռակողմ հանդիպումների անցկացումը, ինչպես նաեւ Իրանի, Ռուսաստանի, Ադրբեջանի, Հայաստանի եւ Թուրքիայի միջեւ հնգակողմ հանդիպումների անցկացումը կարող են նպաստել հնարավոր տարաձայնությունների լուծմանը»,-նշել է Վայեզին:
Նա հավելել է, որ երկու կողմերը քննարկել են 2021 թվականի հունվարի 16-ին համատեղ տնտեսական հանձնաժողով անցկացնելու հարցը:
Վայեզին շեշտել է, որ նույնիսկ կորոնավիրուսի բռնկման ժամանակ երկու երկրների միջեւ առեւտրատնտեսական հարաբերությունները չեն դադարել ոչ մի օր: Նա հավելել է, որ երկու երկրները հասել են առաջընթացի առանձնաշնորհային առեւտրային համաձայնագրի կնքման հարցում: «Մենք նաեւ քննարկել ենք ավտոբուսների, բեռնատարերի եւ տրակտորների արտադրության հարցով գործարան կառուցելու հարցը»,-ասել է Վայեզին:
Մուստաֆաեւն, իր հերթին, հանդիպումից հետո շնորհակալություն է հայտնել կառուցողական աջակցության եւ ԻԻՀ դիրքորոշման համար եւ ասել. «Երկու երկրների առաջնորդները երկկողմ հարաբերությունների հարցը բարձրացրել են ամենաբարձր մակարդակով վերջին 7 տարիներին ընթացքում»:
