Սանկտ Պետերբուրգում 3:1 հաշվով ավարտված Ռուսաստան – Հայաստան խաղից հետո թիմերի գլխավոր մարզիչները մամուլի ասուլիսում իրենց գնահատականն են տվել հանդիպմանը:
Հայաստանի ազգային հավաքականի գլխավոր մարզիչ Վարդան Մինասյանը հայտարարել է, որ Սանկտ Պետերբուրգում թիմն ավելի լավ խաղաց, քան Երեւանում, սակայն հաջողությունն ուղեկցեց դաշտի տերերին, քանի որ Ռուսաստանի հավաքականի խաղացողներն ավելի փորձառու են եւ հանդես են գալիս այնպիսի ակումբներում, որոնց մակարդակն ավելի բարձր է, քան Հայաստանի հավաքականի ֆուտբոլիստների ակումբները: Ըստ Մինասյանի` 1:1 հաշվից հետո խաղն ընթացավ մինչեւ առաջին սխալը եւ հաջորդ գնդակը խփեցին ռուսները: Մինասյանը պատահականություն չի համարել Պավլյուչենկոյի խաղից խփած գոլերը, քանի որ դրանք Հայաստանի հավաքականի դիրքային սխալների հետեւանք էին: Իսկ հաշիվը բացելուց հետո անմիջապես բաց թողնելը բացատրել է 21-22 տարեկան երիտասարդ խաղացողների փորձի պակասով:
Ռուսաստանի գլխավոր մարզիչ Դիկ Ադվոկատը հայտարարել է, որ արժանին պետք է մատուցել Հայաստանի հավաքականին, որը շատ լավ խաղաց: Նա հրաժարվել է գնահատել եզրափակիչ մրցաշարի ուղեգիր նվաճելու Հայաստանի հնարավորությունները` կարեւորելով միայն իր թիմի առաջին տեղ գրավելը:
Խաղի վերաբերյալ Ադվոկատը հայտարարել է, որ իր թիմի գործողություններում ինչ-որ նյարդայնություն կար եւ միակ բանը որ գոհացնում է` հանդիպման հաշիվն է: Ամառային արձակուրդից առաջ Ադվոկատի համար շատ կարեւոր էր հաղթական հաշիվը: Հոլանդացին էլ նշել է, թե Ռուսաստանի հավաքականը Երեւանում ավելի լավ տեսք ուներ:
