Նախկին փոխվարչապետ Արմեն Գեւորգյանի փաստաբան Էրիկ Ալեքսանյանը միջնորդեց նիստը հետաձգելու մասին:
Փաստաբանը հայտնեց, որ իր պաշտպանյալի առողջությունը վատթարացել է, եւ հնարավոր է, որ նրա մոտ կորոնավիրուս է: Գեւորգյանը թեստավորվել է, արդյունքների մասին պատասխանը ստանալուն պես դատարանը կտեղեկացվի:
Դատախազ Գեւորգ Բաղդասարյանը անհրաժեշտ համարեց կասկածել դրա ճշմարտացիությանը եւ դժգոհություն հայտնեց:
Փաստաբանը հիշեցրեց, որ Գեւորգյանը բացակայում է, եւ գնահատականներ տալն անընդունելի է: «Թեստ հանձնելն ինքնանպատակ չի կարող լինել: Թեստը հանձնվում է բժշկական ցուցումներով: Դուք ցանկանում եք ասել, որ թեստ հանձնելը կարող է ինքնանպատա՞կ լինել: Հայտարարությունն անհիմն է, եւ խնդրում եմ այսուհետեւ թույլ չտալ դատախազներին գնահատականներ տալ դատավարության մասնակիցների բացակայությամբ»,- ասաց փաստաբանը:
Դատավոր Աննա Դանիբեկյանը հայտարարեց, որ չի կարող արգելել կարծիք հայտնել, եւ հետաքրքրվեց, թե ինչու էպիկրիզը դատարան չի ներկայացվել:
Փաստաբանը հավաստիացրեց, որ բոլոր փաստաթղթերը կներկայացվեն հաջորդ նիստին: Դատախազների դիտողությունների կապակցությամբ Ալեքսանյանը դատարանին խնդրեց դադարեցնել նման փորձերը:
Դատավորը հետաքրքրվեց՝ փաստաբանն արդյոք շփվե՞լ է իր պաշտպանյալի հետ, եւ եթե այո, ապա դատարանը նրան խնդրում է հնարավորինս արագ թեստ հանձնել: Փաստաբանը նշեց, որ ինքն արդեն ապաքինվել է կորոնավիրուսից, եւ երկրորդ անգամ հիվանդանալու հավանականությունը փոքր է: Այնուամենայնիվ, նա պատրաստակամություն հայտնեց անհրաժեշտություն առաջանալու դեպքում հետեւել դատավորի խորհրդին:
Դատավորը հիշեցրեց, որ հաջորդ նիստում կքննարկվեն անձամբ Էրիկ Ալեքսանյանի դեմ հնարավոր պատժամիջոցները: Ի պատասխան փաստաբանն ասաց, որ ոչ ոք իրենից ավելի շահագրգռված չէ ճշմարտությունը պարզելու հարցում, եւ հավաստիացրեց, որ սպառիչ բացատրություններ կտա:
Հաջորդ նիստը տեղի կունենա մարտի 9-ին, ժամը 13-ին: