Բոստոնի քաղաքապետ Մարտի Ուոլշը քաղաքի հայ համայնքից ներողություն է խնդրել եւ չեղարկել վերջերս արված հայտարարությունը, որով փետրվարի 26-ը հայտարարվել էր «Խոջալուի հիշատակի օր»: Նրա խոսքով՝ որոշումն ընդունելուց առաջ կողմերը հարցը հիմնավոր կերպով քննարկել են: «Հայ-ամերիկյան համայնքի ղեկավարների հետ զրույցներից հետո մենք հասկանում ենք, որ այդ հռչակումը ձեզնից շատերին ցավ է պատճառել»,- նշել է նա:
Անցյալ շաբաթվա ընթացքում Բոստոնի եւ արտասահմանում հայ համայնքների անդամները կապ են հաստատել քաղաքապետարանի հետ, որպեսզի չեղարկվի հայտարարությունը Ամերիկայի Հայ դատի Արեւելյան տարածաշրջանի հանձնախմբի (ANCA-ER) գործողության կոչ անելուց հետո: Սա առաջին դեպքը չէ, երբ քաղաքային կամ պետական իշխանությունը փետրվարի 26-ը հայտարարում է Խոջալուի հիշատակի օր: Գրեթե նույնպիսի հայտարարություններ են արել Պորտլենդի քաղաքապետն ու Մինեսոտայի նահանգապետը, փոխանցում է Armenian Weekly-ն: