Սահմանադրական դատարանի որոշումը վերաբերելու է ոչ միայն Հայաստանի երկրորդ նախագահ Ռոբերտ Քոչարյանին: Սահմանադրական դատարանի որոշումը կա՛մ կհաստատի, կա՛մ վերջապնականապես կկործանի օրենքի գերակայության հիմքերը: Այս մասին «Հայելուն» տված հարցազրույցում հայտարարել է ՀՀ երկրորդ նախագահ Ռոբերտ Քոչարյանի փաստաբան Սեւակ Թորոսյանը:
Ըստ նրա՝ Սահմանադրական դատարանը կարող է նաեւ այնպիսի որոշում կայացնել, որը կհետաձգի հարցը, ասենք, վեց ամսով, մինչեւ պարզվի, թե ով է իշխանության գլխին: «Ես մի բանում համոզված եմ. երբ կառավարությունը փոխվի, վրեժխնդրություն չպետք է լինի: Հակառակը, անհրաժեշտ է օգնել դատավորներին անկախ դառնալ: Կարծում եմ, որ փոքր պետություններում դատական համակարգի անկախությանը հսկայական դեր է հատկացվում: Հանուն դատարանների արդարադատության պետք է գործի Մովսեսի օրենքը: Եւ կոռուպցիան միայն փողը չէ: Դա առաջին հերթին դատարանի անարդար որոշումներ են», - շեշտեց փաստաբանը՝ հավելելով, որ արդար դատարանները Հայաստանի համար լույս են թունելի վերջում, բայց դեռ մութ է:
Փաստաբանը հիշեցրեց, որ եթե Սահմանադրական դատարանը 300.1 հոդվածը Սահմանադրությանը հակասող ճանաչի, ապա Քոչարյանի եւ մյուսների դեմ գործը կարող է կարճվել: Ինչ վերաբերում է Ռոբերտ Քոչարյանին ձերբակալելու պատճառներին, որ Արցախն ավելի հեշտ հանձնվի, Թորոսյանը հայտարարեց, որ ձերբակալման հրամանները վերեւից են տրվում: Ապացույցը բարձրաստիճան պաշտոնյաների հեռախոսային խոսակցությունների ձայնագրությունները, ինչպես նաեւ վերջերս վարչապետի խորհրդական Աննա Վարդապետյանի հետ կապված աղմկահարույց միջադեպն են: «Ես ցավում եմ այդ երիտասարդների համար: Նրանք հիպնոսացված են եւ անխոհեմ են գործում»,- ասաց փաստաբանը՝ հավելելով, որ անօրինական գործողությունների բոլոր մասնակիցները պետք է դատապարտվեն:
