ՍԴ որոշման հրապարակումից հետո Ռոբերտ Քոչարյանի եւ մյուսների գործով դատարանը պետք է այսօր իսկ արտահերթ նիստ գումարի եւ դադարեցնի Ռոբերտ Քոչարյանի ու մյուսների 300.1 հոդվածով քրեական հետապնդումը: Այս մասին ասաց Հայաստանի երկրորդ նախագահ Ռոբերտ Քոչարյանի փաստաբան Հայկ Ալումյանը՝ «Հայելի»-ի հետ զրույցում մեկնաբանելով Սահմանադրական դատարանի որոշումը ՔՕ 300.1 հոդվածը Սահմանադրությանը հակասող ճանաչելու մասին:
Հիշեցնենք, որ հոդվածը նախատեսում է «սահմանադրական կարգի տապալում», նախկին նախագահին մեղադրանք է առաջադրվել հենց այս հոդվածով:
«Սա ըստ օրենքի: Թե ինչ կլինիր գործով՝ չեմ կարող ասել, քանի որ մենք գործ ունենք էքսցենտրիկ անձանց հետ, որոնց գործողությունները անկանխատեսելի են: Նրանք՝ իրենք էլ չեն կարող ասել, թե ինչպես կվարվեն»,- նշեց փաստաբանը: Նրա խոսքով՝ մեղադրանքի կողմը նույնպես պետք է նիստ նախաձեռներ եւ մեղադրանքը հետ կանչեր, քանի որ համապատասխան հոդվածը հակասահմանադրական է ճանաչվել: Սակայն պաշտպանական կողմը չի սպասել դատարանի եւ մեղադրող կողմի գործողություններին, եւ ինքը դեռեւս շաբաթ միջնորդություն է ներկայացրել:
Դրանից բացի, ըստ օրենքի՝ քրեական հետապնդման մարմինները,- իսկ գործում դրանք երկուսն են,- պետք է գրավոր ներողություն խնդրեն Ռոբերտ Քոչարյանից, Յուրի Խաչատուրովից, Սեյրան Օհանյանից եւ Արմեն Գեւորգյանից անօրինական քրեական հետապնդման պատճառով:
Ինչ վերաբերում է խափանման միջոցին, եթե դատարանը դա ընդհանրապես չեղյալ չհայտարարի, ապա պետք է, համենայնդեպս, զգալիորեն նվազեցնի գրավի չափը: Փաստաբանն ընդգծեց, որ երկրորդ մեղադրանքը (կաշառք վերցնելու համար) պայմանավորված է հիմնականի թուլությամբ: «Նրանք դա անում են, երբ վստահ չեն մեղադրանքի հարցում: Չեմ կարծում, որ սա քննիչի գաղափարն է»,- նշեց փաստաբանը` նկատի ունենալով պատվիրատուին: Վարչապետի խորհրդական Աննա Վարդապետյանի մասնակցության մասին ռեպլիկին ի պատասխան՝ փաստաբանը նշեց, որ ինքը չէր կենտրոնանա Վարդապետյանի վրա: «Չեմ ուզում խախտել անմեղության կանխավարկածը: Բայց եթե հաստատվի, նրանք չեն էլ հերքում, ապա նա հաճախորդի եւ պատվարտուի միջեւ հաղորդակցության միջոց է: Այդ ժամանակ մեր գործում կար հաղորդակցության մեկ այլ միջոց»,- հստակեցրեց Ալումյանը՝ միաժամանակ հիշեցնելով հեռախոսային խոսակցությունների հայտնի ձայնագրությունները: «Ըստ ամենայնի, քննարկումներ էին ընթանում, թե ինչպես անեն, որ Ռոբերտ Քոչարյանը չհայտնվի ազատության մեջ եւ չարդարացվի: Ըստ ամենայնի, այդ ժամանակ էլ խորհուրդ են տվել «լրացնել» մեղադրանքը: «Իրավապահների» ոճով, ովքեր գրպանի մեջ թմրանյութ են նետում»,- շարունակեց փաստաբանը: Ալումյանը շեշտեց, որ կաշառք վերցնելու վերաբերյալ մեղադրանքը տրամաբանության մեջ չի տեղավորվում. նյութեր մի բանի մասին են, մեղադրանք`մեկ այլ բանի մասին: Փաստաբանը նշեց, որ բոլոր դատարաններն, ի դեպ, ընդունել են, որ այս հոդվածով չկա հիմնավորված կասկած:
Ալումյանը նախընտրեց առայժմ ոչինչ չասել պաշտպանական կողմի հետագա քայլերի մասին:
