ՀՀ երկրորդ նախագահ Ռոբերտ Քոչարյանի եւ մյուսների գործով դատական նիստի ժամանակ մեկ ընդմիջումը սահուն փոխարինվեց երկրորդով:
Հիշեցնենք, որ առաջին ընդմիջումը դատավոր Աննա Դանիբեկյանը հայտարարեց, որպեսզի հնարավորություն տա փաստաբաններին ծանոթանալու դատախազի միջնորդությանը: Վերջինս մտադիր է միջնորդել ՍԴ դիմելու մասին: Ակնհայտ է, որ խոսքը մեղադրանքի վերաորակավորման մասին է:
Ընդմիջումից հետո դահլիճ չհասցրեցին մտնել որոշ փաստաբաններ: Դատավորն ամիջապես նոր ընդմիջում հայտարարեց:
Դանիբեկյանի գործողությունները վրդովվեցրեցին փաստաբաններին: Հայկ Ալումյանը փորձեց դատավորին հիշեցնել հետաքննության անօրինականության մասին, սակայն՝ ապարդյուն:
Մարտի 25-ին ՍԴ-ն հրապարակել էր որոշման եզրափակիչ մասը, իսկ մարտի 29-ի երեկոյան՝ 42-էջանոց լրիվ տեքստը: ՍԴ որոշումը վերջնական է եւ ենթակա չէ բողոքարկման: ՍԴ-ն 300.1 հոդվածը համարել էր անորոշ իրավունքի եւ մեղսագրվող արարքի տեսակետից, պարզ չէ, թե ինչ կարգի տապալման մասին է խոսքը՝ հաշվի առնելով, որ հոդվածն ընդունվել է մի Սահմանադրությամբ, իսկ փորձել են կիրառել մեկ այլ Սահմանադրությամբ:
ՀՀ երկրորդ նախագահ Ռոբերտ Քոչարյանը, ՀԱՊԿ նախկին գլխավոր քարտուղար Յուրի Խաչատուրովը, պաշտպանության նախկին նախարար Սեյրան Օհանյանը եւ նախկին փոխվարչապետ Արմեն Գեւորգյանը մեղադրվում են հենց այդ հոդվածով՝ սահմանադրական կարգի տապալում: Փաստացի, դատարանը պետք է դադարեցնի այդ հոդվածով քրեական հետապնդումը վերը թվարկված անձանց, ինչպես նաեւ նմանատիպ մեղադրանքով այդ գործի շրջանակում անձանց նկատմամբ:
