Դատավոր Աննա Դանիբեկյանը հրապարակում է Հայաստանի երկրորդ նախագահ Ռոբերտ Քոչարյանի, ՀԱՊԿ նախկին գլխավոր քարտուղար, գեներալ-գնդապետ Յուրի Խաչատուրովի, պաշտպանության նախկիրն նախարար, գեներալ-գնդապետ Սեյրան Օհանյանի, նախկին փոխվարչապետ Արմեն Գեւորգյանի նկատմամբ ՔՕ 300.1 հոդվածով քրեական հետապնդումը դադարեցնելու հարցով որոշումը:
Սահմանադրական դատարանը մարտի 26-ին Ռոբերտ Քոչարյանի եւ առաջին ատյանի դատարանի դիմումի քննության արդյունքներով որոշում ընդունելուց հետո, որը ՔՕ 300.1-րդ հոդվածը ՀՀ Սահմանադրության 78 եւ 79-րդ հոդվածներին հակասող եւ անվավեր ճանաչեց, հրապարակեց որոշման եզրափակիչ մասը, իսկ մարտի 29-ին՝ 42-էջանոց լրիվ տեքստը: ՍԴ որոշումը վերջնական է եւ ենթակա չէ բողոքարկման: Պարզ չէ, թե ինչ կարգի տապալման մասին է խոսքը՝ հաշվի առնելով, որ հոդվածն ընդունվել է մի Սահմանադրությամբ, եւ փորձել են կիրառել մեկ այլ Սահմանադրությամբ: Ռոբերտ Քոչարյանը, Յուրի Խաչատուրովը, Սեյրան Օհանյանը եւ Արմեն Գեւորգյանը մեղադրվում են հենց այդ հոդվածով՝ սահմանադրական կարգի տապալում: Փաստացի, դատարանը պետք է դադարեցնի այդ հոդվածով քրեական հետապնդում վերը թվարկված անձանց, ինչպես նաեւ նմանատիպ մեղադրանքով այդ գործի շրջանակում անձանց նկատմամբ: Չնայած դրան՝ մարտի 30-ի նիստում դատավոր Դանիբեկյանը հրաժարվեց դադարեցնել քրեական հետապնդումը եւ դատախազների բացակայության պատճառով նիստը հետաձգեց ապրիլի 2-ին: Ապրիլի 2-ի նիստում դատախազները պնդեցին 300.1 հոդվածով քրեական հետապնդման դադարեցման մասին միջնորդությունը քննել ՍԴ դիմելու մասին իրենց միջնորդության հետ: Դատավորը որոշեց միջնորդությունը առանձին քննել: Խոսքն այն մասին է, որ մեղադրանքը վերաորակելու հնարավորություն ստանան, քանի որ ներկայումս օրենսդրությունը դա թույլ չի տալիս:
