Քրեական օրենսգրքում եւ հարակից օրենքներում կատարված փոփոխությունները կապված են ընտրական գործընթացների հետ: Այդ պատճառով այդ փոփոխությունները պետք է ընդունվեն անհապաղ երկրում արտահերթ խորհրդարանական ընտրություններից առաջ, որոնք նշանակված են հունիսի 20-ին: Այս մասին Հայաստանի Ազգային ժողովի արտահերթ նիստին Քրեական օրենսգրքում փոփոխություններ եւ լրացումներ կատարելու մասին օրինագծերի փաթեթի քննարկման ժամանակ հայտարարեց օրենսդրական նախաձեռնության հեղինակ, իշխող «Իմ քայլը» դաշինքի պատգամավոր Վահագն Հովակիմյանը:
Նախատեսվում է, որ փոփոխություններն ուժի մեջ կմտնեն օրենքի պաշտոնական հրապարակումից անմիջապես հետո: «Այս փաթեթն անհրաժեշտ է երկրում ազատ, արդար եւ ավելի մրցակցային ընտրություններ կազմակերպելու համար: Մենք փոփոխություններ ենք առաջարկում, որոնք կարեւոր են ընտրությունների համար»,- ասաց Հովակիմյանը:
Պատգամավորը վստահ է, որ իրենց կհաջողվի ազատ, արդար, թափանցիկ եւ մրցակցային ընտրություններ կազմակերպել: Խորհրդարանի ամբիոնից նա շտապեց հայտարարել, որ ընտրություններին մասնակցող սուբյեկտների նկրտումները ոչ մի կերպ չեն ազդի ընտրությունների որակի վրա, եւ օրինախախտները կկանգնեն արդարադատության առջեւ: «Քաղաքական կամքը, որը քաղաքական մեծամասնությունն ունի ազատ, արդար, թափանցիկ եւ մրցակցային ընտրություններ կազմակերպելու համար, անսասան է: Մենք ոչ մեկին թույլ չենք տա իրենց կեղտոտ ձեռքերով կեղտ նետել մեր ընտրական համակարգի կայունության վրա», - նշեց բազմաթիվ սկանդալային օրինագծերի հեղինակը:
Նշենք, որ փոփոխությունների բուն էությունը քրեական պատասխանատվության սահմանումն է ընտրական քարոզարշավի անցկացմանը խոչընդոտելու համար: Ինչպես արդեն նշել են փորձագետները, իշխանությունները հապճեպ կերպով փաթեթ են նախապատրաստել վարչապետ Նիկոլ Փաշինյանի՝ Սյունիքի մարզ կատարած այցի ձախողումից հետո, որի բնակիչները նրան դուրս վռնդեցին՝ մեղադրելով դավաճանության մեջ:
