ՀՀ ոստիկանության աշխատակիցները մայիսի 11-ին Երեւանում իրականացրել են ոստիկանական հատուկ օպերացիա, որը կրել է «Հետախուզվողը չի կարող երկար մնալ թաքնված» անունը։
Shamshyan.com-ի հաղորդմամբ, քրեական ոստիկանությունում օպերատիվ տեղեկություններ էին ստացվել, որ առանձնապես ծանր հանցագործության մեջ հետախուզվող Արարատի մարզի Դալար գյուղի բնակիչ՝ 39-ամյա Վարդան Մինասյանը Արտաշատ քաղաքից Toyota մակնիշի տաքսի ավտոմեքենայով ուղղություն է վերցրել դեպի Երևան:
Ոստիկանները օպերատիվ ձևով կատարել են անրաժեշտ դարանակալումներ. կասկածյալը տաքսի ավտոմեքենայով նախ հայտնվել է Արտաշատի ոստիկանների տեսադաշտում, ու արդեն, երբ Toyota-ն մոտենել է Երևանի Շենգավիթ վարչական շրջանի Նորագավիթ 1-ին փողոցի 100 հասցեի դիմացի հատված, ՃՈ ծառայողը կանգնեցրել է ավտոմեքենան և պահանջել, որ վարորդը ներկայացնի ավտոմեքենայի փաստաթղթերը։
Վարորդը իջել է ավտոմեքենայից ու երբ մոտեցել է ՃՈ ծառայողին, ավտոմեքենայում գտնվողը առևանգել է մեքենան: Սկսվել է հետապնդում, փախուստի դիմած ավտոմեքենան ընթացքում վնասել է մի քանի ավտոմեքենաներ, սակայն առևանգողը չի կարողացել դիմել փախուստի: Նա հայտնվել է ոստիկանների շրջափակման մեջ, ու առևանգված ավտոմեքենան վարած Վ. Մինասյանը վնասազերծվել և բերման է ենթարկվել ոստիկանության Արտաշատի բաժին։
Կայքի տեղեկություններով՝ նա հետախուզվում էր ՀՀ քր.օր-ի 175 հոդվածի 2-րդ մասի 1-ին և 4-րդ կետերով։ Նա կասկածվում է Արարատի մարզի Նորաշեն գյուղի գյուղապետի պաշտոնակատար, «Իմ քայլի» անդամ Արտակ Հարությունյանի եղբորը՝ 33-ամյա Պետիկ Հարությունյանին, դանակահարելու, նրա Porsche Cayenne-ն առևանգելու մեջ։
Ավելի վաղ հայտնել էինք, որ մայիսի 3-ին ոստիկանության ծառայողները շրջայց կատարելու ժամանակ Նոր Նորք վարչական շրջանում նկատել էին առանց համարանիշների Porsche Cayenne մակնիշի ավտոմեքենա:
Ոտիկանները, ունենալով հնարավոր կասկածներ, պարզել էին, որ նշված ավտոմեքենան ապրիլի 26-ին Արարատի մարզում առևանգվել էր, ինչի առթիվ էլ ավազակային հարձակում կատարելու հատկանիշներով հարուցվել էր քրեական գործ:
Հայտնաբերված Porsche Cayenne-ը պատկանում է Արարատի մարզի Նորաշեն գյուղի գյուղապետի պաշտոնակատար, «Իմ քայլը» անդամ Արտակ Հարությունյանի եղբորը՝ 33-ամյա Պետիկ Հարությունյանին, ում ավտոմեքենան առևանգելուց առաջ դանակահարել էին: Նա Բանգլադեշում հայտնի «Նեպտունի Համիկի» սանիկն է։
Աղբյուրի տեղեկություններով՝ Արարատի մարզի ոստիկանները պարզել էին ավազակային հարձակում կատարող կասկածյալների ինքնությունը. նրանք են՝ Արարատի մարզի բնակիչ՝ 39-ամյա Վարդան Մ.-ն և Երևանի բնակիչներ՝ 28-ամյա Երջանիկ Կ.-ն և 26-ամյա Դավիթ Կ.-ն: Վերջիններս հարազատ եղբայրներ են: