Համացանցում է տարածած է փաստաթուղթ, որը վերաբերում է Հայաստանի, Ռուսաստանի եւ Ադրբեջանի միջեւ հանձնաժողով ստեղծելու հարցին եւ սա ինչ-որ փաստաթղթի հավելված է: Այս մասին, այսօր՝ մայիսի 20-ին, ԱԺ-ում հայտարարեց ԼՀԿ խմբակցության ղեկավար Էդմոն Մարուքյանը:

«Մենք նաեւ հրավիրել ենք վարչապետին ԱԳ նախարարին, ՊՆ նախարարին, որ այս հարցերին անդրադառնան: Ես հիմա ուզում եմ հնչեցնել հարցեր ուղղված նրանք.

Արդյոք տարածված փաստաթուղթը իրական այն փաստաթուղթն է, որը վարչապետի պաշտոնակատարը պատրաստվում է ստորագրել:

Արդյոք հնարավոր չէր մինչեւ նոր իշխանության ձեւավորումը չբանակցել եւ չստորագրել որեւէ փաստաթուղթ: Վերջիվերջո մենք գնում ենք ընտրությունների, որովհետեւ խարխլվել է ժողովրդի կողմից տրված մանդատը եւ մենք գնում ենք տեսնենք, թե որ ուժը պետք է շարունակի ՀՀ կառավարումը եւ որ ուժը պետք է բանակցի նմանատիպ փաստաթղթեր:

Նշված հանձնաժողովը, ըստ այս փաստաթղթի, արդյոք նաեւ Արցախի սահմանների հետ կապված որեւէ հարց է քննարկելու:

Ես արդեն տեսել եմ իշխանության ներկայացուցիչների հայտարարություններ, որ այս փաստաթուղթը խորհրդարանի վավերացմանը ենթակա չէ»,-ասաց Մարուքյանը, որ ընթերցեց միջազգային պայմանագրերի մասին օրենքի մի հատված, ըստ որի, ցանկացած միջազգային համաձայնություն անկախ դրա անվանումից, պետք է վավերացվի ԱԺ-ի կողմից:

«Մարդիկ կան, որ ասում են, եթե անունը հայտարարություն է, դա համաձայնագիր չի, պայմանագիր չի, հետեւաբար պետք չի գնա ՍԴ, չպետք է գա ԱԺ  եւ վավերացվի: Ըստ մեր միջազգային պայմանագրերի մասին օրենքի, դա համարվում է պայմանագիր:

Բացի այդ, ըստ օրենքի միջազգային պայմանագիրը վավերացվում է, եթե այն վերաբերում է մարդու եւ քաղաքացու հիմնարար իրավունքներին ու ազատություններին: Քանի որ խոսքը սահմանազատման մասին է, դա նշանակում է, որ այդ տարածքներում ապրող մարդկանց իրավունքներին դա առնչվում է: Մյուս հիմքը, ԱԺ վավերացման են ենթակա նաեւ այն միջազգային պայմանագրերը, որոնք ունեն քաղաքական կամ ռազմական բնույթ: Այս փաստաթուղթը ունի քաղաքական բնույթ եւ հետեւանքներ, որոնք ռազմական նշանակություն ունեն:

Վերջինը, միջազգային պայմանագրերը ենթակա են ԱԺ վավերացման, եթե դրանք նախատեսում են օրենսդրության փոփոխություն: Հիմա այդ հանձնաժողովը քննարկում է, որոշում է կայացնում ու ասում, որ սա է սահմանը: չէինք գալո՞ւ մեր վարչատարածքային բաժանման մասին օրենքը փոխելու: Դա նշանակում է, որ այդ փաստաթուղթը պետք է վավերացվի ԱԺ կողմից: Եթե չվավերացվի ԱԺ կողմից, այն չի կարող կյանքի կոչվել»,-ասաց Մարուքյանը:

Նա հարց բարձրացրեց, թե ինչու են քաղաքական ուժերը, հասարակությունը այս փաստաթղթի շուրջ բանակցությունների մասին իմանում ոչ պաշտոնական աղբյուրներից: «Հայ ժողովուրդն արդեն երկու օր ոչ քուն ունի, ոչ դադար: Սրա պատասխանն ո՞վ է տալու»:

Հիշեցնենք, որ մայիսի 19–ին Սուրբ Աթոռում ՀՀ նախկին դեսպան Միքայել Մինասյանը ֆեյսբուքյան իր էջում գրել էր, որ Նիկոլ Փաշինյանը պատրաստվում է ստորագրել եռակողմ փաստաթուղթ, որով հինգ գյուղ Տավուշում և մեկ գյուղ Արարատում զիջելու է ադրբեջանցիներին մինչև հայ–ադրբեջանական սահմանի վերջնական սահմանազատումը։ Նրա խոսքով՝ Փաշինյանն Ալիևին դեռևս հունվարի 11–ին է բանավոր պայմանավորվածությամբ խոստացել այս զիջումը, սակայն ավելի ուշ փորձել է հետաձգել խոստումը կատարելու ժամկետները՝ պատճառաբանելով, որ խոստանալիս չգիտեր, որ ընտրություններ են լինելու, ի պատասխան Ալիևը ներխուժել է Սյունիք և Գեղարքունիք։ Փաշինյանը փորձել է պաշտպանություն գտնել Կրեմլում, որտեղից հնչել է երկու հարց. Ինչո՞ւ էր խոստանում, եթե չէր անելու, և ի՞նչ է Կրեմլից իր ակնկալիքը։

Մինասյանը պնդում է, որ այս փաստաթղթի վրա աշխատանքն ավարտված է, այն շուտով կստորագրվի և կհրապարակվի։ Ըստ նրա, փաստաթուղթն ունի նաև գաղտնի հավելված, որում ամրագրված է դեմարկացիայի երկկողմ հանձնաժողովի ստեղծումը և վեց գյուղերի հանձնումը՝ լղոզված ձևակերպումներով։

Այսօր՝ մարտի 20 կառավարության նիստին Փաշինյանը, ըստ էության, չհերքեց այդ փաստաթղթի գոյությունը, ավելին՝ հայտարարեց, որ ինքը պատրաստվում է ստորագրել այն, քանի որ այն «100 տոկոսով բխում է Հայաստանի շահերից»։