Էլեկտրամոբիլների շուկայում Tesla-ի նոր մրցակից է հայտնվել: Խոսքը կոմերցիոն հաճախորդների համար Ford F-150 Lightning Pro պիկապի մասին է: The Verge-ը հայտնում է, որ 370 կիլոմետր պահուստային ընթացքով մեքենան 39 974 դոլար կարժենա: Իսկ էլեկտրական մեքենան, որը մարտկոցի մեկ լիցքավորմամբ 482 կիլոմետր կարող է անցնել, արդեն 49 974 դոլար կարժենա:
Պիկապը վաճառքի կդրվի 2022 թվականին: Ավտոմեքենայի հիմնական մրցակիցներն են Tesla Cybertruck-ը եւ GMC Hummer-ը: Չնայած այն հանգամանքին, որ էլեկտրապիկապի վաճառքը դեռեւս չի սկսվել, ընկերությունն արդեն տասնյակ հազարների պատվերներ է ստացել:
Ford Motor-ի գլխավոր տնօրեն Ջիմ Ֆարլին ասել է, որ առաջին մի քանի օրվա ընթացքում արտադրողը ստացել է ավելի քան 44 000 պատվեր:
Առաջիկա երկու տարիների ընթացքում մի քանի էլեկտրական պիկապներ շուկա դուրս կգան, այդ թվում` Tesla Cybertruck-ը, GMC Hummer EV-ը եւ Rivian R1T-ը: Բայց դրանցից գրեթե ոչ մեկը հատուկ կոմերցիոն օգտագործման համար նախատեսված չէ: Մի քանի օրինակներից մեկը ստարտափի կողմից մշակված Lordstown Motors էլեկտրական պիկապն է: Ենթադրվում է, որ այս բեռնատարի արտադրությունը կսկսվի ընթացիկ տարվա վերջին, բայց դրա արժեքը կկազմի շուրջ 52 000 դոլար: