Հարեւանները հասկացել են, որ այդ կանաչ տանը ինչ-որ բան այն չէ, երբ երիտասարդ կնոջ բղավոցներ են լսվել Սան Սալվադորից մոտ 80 կիլոմետր հեռավորության վրա գտնվող փոքրիկ Չալչուապա քաղաքում իրենց թաղամասի լռության մեջ:
26-ամյա Ժակլին Պալոմո Լիման եւ նրա մորը գայթակղելով առանց պատուհանների տուն է տարել 51-ամյա նախկին ոստիկան Հուգո Օսորիոն, որը նրանց կորած եղբոր մասին տեղեկություններ է խոստացել, գրում է Reuters-ը:
Հարեւանները ոստիկանություն են զանգահարել, երբ մայիսի 7-ի գիշերը լսել են Ժակլինի ճչոցը, երբ նա փորձել է փախչել տանից, բայց Օսորիոն բռնել է, մետաղյա խողովակով հարվածել է նրա գլխին եւ հետ քաշել ներս: Պալոմոյի, նրա եղբոր եւ մոր մարմինները, ինչպես նաեւ 14 դիակներ են հայտնաբերվել տան ետեւում գտնվող զանգվածային գերեզմանում, լրագրողներին ասել է արդարադատության եւ անվտանգության նախարար Գուստավո Վիլյատորոն:
Սալվադորն աշխարհում բռնի հանցագործությունների ամենաբարձր ցուցանիշներից մեկն ունի: Բայց նույնիսկ քաոսին սովոր այս երկրում Օսորիոյի գործը ցնցել է հասարակությանը: Տեղական լրատվամիջոցները բնակավայրն անվանել են «սարսափների տուն»:
Օսորիոյի ենթադրյալ խոստովանության մանրամասների համաձայն, նա խոստովանել է, որ թիրախավորել է հիմնականում աղքատ կանանց եւ աղջիկներին՝ ԱՄՆ-ում աշխատանքի կամ օգնության խոստումներով նրանց տուն կանչելով: Անվտանգության նախարարը նրան անվանել է «ցնդած»:
Բայց իրավապահ մարմիններում Օսորիոյի փորձի, մեծ թվով հավանական հանցակիցների եւ գործի վերաբերյալ հանրային տեղեկատվության պակասի պատճառով որոշ սալվադորցիներ չգիտեն, թե ինչին հավատան։