Թուրքիայում ձերբակալվել է քուրդ ընտանիքի սպանության մեջ կասկածվողը: Տեսախցիկներում երեւում է, թե ինչպես է Մեհմեթ Ալթունը կրակում զոհերի վրա։
Ինչպես հայտնում է Mezopotamya գործակալությունը, Ալթունը թաքնվում էր Կոնիայի Բոզկիր շրջանի գյուղական վայրում:
Հուլիսի 30-ին Ալթունը վարձակալված մեքենայով բարձրացել է Մերամ թաղամասում գտնվող Դեդեօղլու ընտանիքի տուն: Տեսագրություններում երեւում է, որ սկզբում նա խոսում է ընտանիքի ղեկավար Յաշար Դեդեօղլուի հետ, իսկ դրանից անմիջապես հետո կրակ է բացում ամբողջ ընտանիքի վրա:
Ալթունը մեկնելուց առաջ հրկիզել է տունը: Հրդեհը կարճ ժամանակ անց մարվել է, սակայն ընտանիքի յոթ անդամներ զոհվել են:
Դրանից անմիջապես հետո Կոնիայի գլխավոր դատախազությունը ձերբակալել էր 14 կասկածյալի, իսկ Ալթունը մնացել էր ազատության մեջ: Չորեքշաբթի օրը 14 կասկածյալներից 10 -ը ձերբակալվել են:
Զոհերի փաստաբան Աբդուրահման Կարաբուլուտն ասել է, որ Ալթունը ինքնուրույն չի ծրագրել սպանդը: «Պարզվեց, որ ագրեսորի ընտանիքը ստեղծել է WhatsApp խումբ՝ մայիսի 12-ին ընտանիքի վրա հարձակումից հետո սպանդը կազմակերպելու եւ պլանավորելու համար»,- գրել է Կարաբուլուտը:
Մայիսին 60 հոգուց բաղկացած մեծ խումբը հարձակվել է Դեդեօղլուի տան վրա՝ կոտրելով ապակիները եւ ծանր վիրավորելով ընտանիքի մեկ անդամի: Ընտանիքը շարունակում էր մահվան սպառնալիքներ ստանալ այն անձանցից, ովքեր ներկայանում էին Ülkü Ocakları-ի՝ ծայրահեղ աջ Ազգայնական շարժում կուսակցության կազմակերպություն:
Մեկ այլ քուրդ հուլիսի 21-ին սպանվել է Կոնիայի գյուղում՝ ռասիստական հարձակման հետեւանքով:
