Իշխանության հետ հետկուլիսային պայմանավորվածություն չի եղել եւ չի լինի: Այս մասին լրագրողների հետ զրույցում ասաց ԱԺ փոխխոսնակ Իշխան Սաղաթելյանը:
Հիշեցնենք, որ Սաղաթելյանը ընտրվել է երրորդ փորձից:
Նա ցավով նշեց, որ նորընտիր խորհրդարանն այդքան ժամանակ կորցրեց քննարկման վրա: «Սակայն կա սահմանադրական պահանջ, եւ ընտրությունը կատարվեց երրորդ փորձից»,-նշեց նա:
Սաղաթելյանը շնորհակալություն հայտնեց իր գործընկերներին եւ մամուլին՝ քաղաքացիներին համբերություն մաղթելով:
Պատասխանելով հարցին, թե արդյոք պայմանավորվածություն է եղել իշխանության հետ, Սաղաթելյանը նշեց, որ գործընթացը հանրային է եղել, եւ իշխանության հետ հետկուլիսային պայմանավորվածություն չի եղել եւ չի լինի:
«Կան բազմաթիվ հարցեր, այդ թվում կապված տարածքային ամբողջականության սպառնալիքի հետ: Երկար ժամանակ է՝ թշնամական զորքերը գտնվում են ՀՀ ինքնիշխան տարածքում»,-նշեց Սաղաթելյանը:
Նրա խոսքով՝ իշխանության հետ բոլոր հարաբերությունները հանրային կլինեն: Պատասխանելով ընդդիմության տեսանկյունից երեք կարեւոր հանձնաժողովների մասին հարցին՝ Սաղաթելյանը նշեց ուղղությունները՝ անվտանգություն, արտաքին քաղաքականություն եւ տնտեսություն: Նա նշեց, որ սոցիալական հարցերի հանձնաժողովը չի կարող լուծել արցախցիների հարցերը:
