Չինական Xiaomi ընկերությունը 2021 թվականի հունիսին առաջին անգամ դարձել է սմարթֆոնների վաճառքի համաշխարհային առաջատարը, հայտնում է Counterpoint Research վերլուծական գործակալությունը:
Դրա տվյալներով՝ համաշխարհային շուկայում ընկերության վաճառքների մասնաբաժինը հունիսին կազմել է 17.1 տոկոս: Երկրորդ տեղը զբաղեցրել է հարավկորեական Samsung-ը՝ 15.7 տոկոս մասնաբաժնով, երրորդն ամերիկյան Apple ընկերությունն է՝ 14.3 տոկոսով:
Ընդ որում, Xiaomi սմարթֆոնների վաճառքները հունիսին մայիսի համեմատ աճել են 26 տոկոսով: Այս աճի տեմպը ընկերության համար ամենաբարձրն էր ամբողջ պատմության ընթացքում:
Counterpoint-ի հետազոտությունների գծով տնօրեն Տարուն Փաթաքը, մեկնաբանելով փոփոխությունները սմարթֆոնների համաշխարհային շուկայու, նշել է, որ «Huawei-ի անկումից ի վեր Xiaomi-ն հետեւողական եւ ագրեսիվ ջանքեր է գործադրել ձեւավորված բացը լրացնելու համար»:
Բացի այդ, փորձագետները Xiaomi-ի վաճառքների արագ աճը կապում են չինական շուկա Samsung սմարթֆոնների սահմանափակ մատակարարման հետ: Ընդ որում, Վիետնամում կորոնավիրուսային համավարակի նոր ալիքի պատճառով հունիսին Samsung-ի արտադրությունը դադարեցվել էր, ուստի Xiaomi-ն ամենից շատ օգուտ քաղեց իրավիճակից: Սակայն փորձագետները կանխատեսում են, որ համավարակից հետո Samsung-ը կվերադառնա առաջատար դիրքին սմարթֆոնների շուկայում:
Չինական արտադրողն իր ստեղծման օրվանից՝ 2011 թվականից, արտադրել է շուրջ 800 միլիոն սմարթֆոն: