Աշխարհահռչակ Lufthansa ավիաընկերությունը մտնում է հայկական շուկա: Ինչպես լրագրողների հետ զրույցում ասաց «Արմենիա միջազգային օդանավակայաններ» ընկերության տնօրեն Մարսելո Վենդեն, ամենահեղինակավոր եւ հուսալի ավիաընկերություններից մեկի հետ համագործակցությունը ՀՀ բնակիչների համար նոր հնարավորություններ կստեղծի, մասնավորապես, նրանք կարող են ճանապարհորդել 280 ուղղություններով աշխարհի 100 երկրներում:
Նրա խոսքով՝ այդ համագործակցության շնորհիվ ավելի շատ զբոսաշրջիկ կգա Հայաստան: ԱՄՆ-ից եւ ԵՄ երկրներից զբոսաշրջիկների թիվը սկսած 2012 թվականին ամեն տարի աճում է:
Ավելին, այդ համագործակցությունը դրական կազդի երկրի տնտեսության վրա:
Իր հերթին, Կենտրոնական, Արեւելյան եւ Հարավարեւելյան Եվրոպայում Lufthansa Group-ի վաճառքների գծով տնօրեն Փիթեր Փուլեմը նշեց, որ Lufthansa-ն այժմ օգտագործում է իր 700 ինքնաթիռներից 534-ը եւ ավիաթռիչքներ իրականացնում 275 ուղղություններով:
Փուլեմը նաեւ նշեց, որ ընկերությունը կենտրոնացած է 3 հիմնական ոլորտների վրա՝ ներդրումներ նոր տեխնոլոգիաներում եւ նոր ինքնաթիռների պատվեր, ենթակառուցվածքի լավացում եւ մթնոլորտում ածխաթթու գազի արտանետման կրճատում:
Իր հերթին, Ուկրաինայում, Բելառուսում, Թուրքմենստանում եւ Հարավային Կովկասում Lufthansa Group-ի վաճառքի գծով մենեջեր Ռենե Կոյնչակը նշեց, որ Lufthansa Group-ից մի քանի ավիաընկերություն արդեն չվերթներ իրականացնում է Հայաստանում: Մասնավորապես, մի քանի օր առաջ հաղորդվեց, որ Eurowings ավիաընկերությունը ուղիղ չվերթներ կառաջարկի դեպի Հայաստան՝ իր ուղեւորների համար առաջին անգամ հնարավորություն ստեղծելով Քյոլնից/Բոնից մեկնել Հայաստանի մայրաքաղաք Երեւան:
Կոյնչակի խոսքով՝ ակնկալվում է, որ խմբի տարբեր ընկերություններ շաբաթական 16 չվերթներ կիրականացնեն դեպի Երեւան:
Սկզբնական շրջանում Lufthansa-ն մտադիր է շաբաթական երեք չվերթ իրականացնել Ֆրանկֆուրտից Երեւան եւ հակառակ ուղղությամբ: Հետագայում նոր չվերթներ կիրականացվեն Երեւանից Վիեննա, Բրյուսել, Քյոլն եւ Ֆրանկֆուրտ:
Կոյնչակը նաեւ նշել է, որ Lufthansa-ի ինքնաթիռներով ճանապարհորդեն ցանկացող մարդիկ պետք է ունենան կորոնավիրուսի բացասական թեստ կամ պետք է պատվաստված լինեն:
