Շվեյցարական դատարանը Քուվեյթի ազդեցիկ շեյխ Ահմադ ալ Ֆահադ ալ Սաբահին մեղավոր է ճանաչել Քուվեյթում իր քաղաքական մրցակիցների դեմ ենթադրյալ դավադրության հետ կապված փաստաթղթերի կեղծման գործով, հայտնել է AFP-ն:
Ժնեւի քրեական դատարանը Քուվեյթի շեյխ Ահմադին դատապարտել է 30 ամսվա ազատազրկման:
Չորս այլ մեղադրյալներ` երեք փաստաբաններ Ժնեւից եւ քուվեյթցի օգնականը, նույնպես մեղավոր են ճանաչվել եւ դատապարտվել մինչեւ 36 ամսվա ազատազրկման:
Շեյխ Ահմադին մեղադրանք է առաջադրվել փաստաթղթերի կեղծման բարդ սխեմայի մշակման համար, որով փորձում էր ապացուցել, որ Քուվեյթի նախկին վարչապետն ու խորհրդարանի խոսնակը մեղավոր են պետական հեղաշրջման դավադրության եւ կոռուպցիայի մեջ: Շեյխը հերքել է մեղադրանքները:
Քուվեյթի իշխող ընտանիքի բարձրաստիճան անդամ շեյխ Ահմադը մեղադրվել է կասկածելի տեսանյութերի օրինականացման համար կեղծ արբիտրաժային գործի կազմակերպման մեջ, որը նա ներկայացրել է որպես նախկին վարչապետ շեյխ Նասեր Մոհամմադ ալ Ահմադ ալ Սաբահի եւ խորհրդարանի նախկին նախագահ Ջասեմ ալ Խորաֆիի կոռուպցիոն գործողությունների ապացույց:
