Ելնելով թեմայի արդիականությունից, NEWS.am-ը մի քանի հարց ուղղեց Երևանի կոնյակի գործարանի գործադիր տնօրեն Սերգեյ Խաչատրյանին։
Պարոն Խաչատրյան, ի՞նչ գին է սահմանել այս տարի Երևանի կոնյակի գործարանը
Մթերվող խաղողի մեկ կիլոգրամի գինը սահմանվել է 155 դրամ։ Այն գործելու է բոլոր մասնաճյուղերի համար՝ Արմավիրի, Այգավանի և թե´ Տավուշի։ Չնայած համավարակից բխած տնտեսական բարդ իրավիճակի, Երևանի կոնյակի գործարանը կպահպանի անցյալ տարվա մթերման ծավալները։ Արմավիրի մասնաճյուղում մթերումները կմեկնարկեն սեպտեմբերի 14-ին, Այգավանում և Տավուշում՝ սեպտեմբերի 15-ին և 17-ին համապատասխանաբար։
Գնի մասին նախապես հայտարարվե՞լ է
Թե՛ գնի, և թե՛ քանակների մասին ԵԿԳ-ի հետ համագործակցող խաղողագործները տեղեկացվել են դեռևս գարնանը՝ ապրիլ ամսին, երբ մեկնարկեցինք պայմանագրերի կնքման գործընթացը։ Հետևելով ԵԿԳ-ի կողմից որդեգրված քաղաքականությանը, գինը ամրագրվում է պայմանագրի մեջ և, ինչպես նախորդ տարիներին, գործում է մթերվող ամբողջ ծավալի համար։ Սա տարիների ընթացքում ներդրված պրակտիկա է։ Այլ կերպ ասած, խաղողագործի հետ մեր երկխոսությունը չի մեկնարկում և ավարտվում սեպտեմբերին, այլ հարատև և սերտ գործընթաց է։ Նշեմ նաև, որ ինչպես և նախորդ տարիներին ընկերությունը անհանդուրժող է լինելու խաղողի որակական շեղումների հարցում։
Ելնելով համաճարակաբանական բարդ շրջանից, ինչպե՞ս եք կազմակերպելու մթերման գործընթացը։
Յուրաքանչյուր խաղողագործ տեղեկացված է իր կողմից մատակարարվող օրվա և ժամի մասին, ուստի մթերման գործընթացը կկազմակերպվի հնարավորինս սահուն։ Նման մոտեցումը, իհարկե, նորություն չէ Երևանի կոնյակի գործարանի համար, բայց անշուշտ անցյալ տարի վերանայվեցին անվտանգության երաշխիքները ելնելով COVID-յան իրականությունից։ Ուստի, այս տարի ևս, յուրաքանչյուր մասնաճյուղում մթերմանը և խաղողագործների անմիջական շփման հետ կապված ցանկացած գործընթաց անցկացվելու է՝ պահպանելով մշակված և ներդրված անվտանգության խիստ կանոնները։