Իրավապահ մարմինները ձերբակալել են Մոսկվայի «Վնուկովո» օդանավակայանում արտաքսման ժամանակ փախած Հայաստանի քաղաքացիների հանցակցին: Այս մասին «Լենտա»-յին հայտնել է ՌԴ քննչական կոմիտեի Մոսկվայի բաժնի ներկայացուցիչ Յուլիա Իվանովան:
Նրա խոսքով` 1995 թվականին ծնված տղամարդուն մեղադրանք կառաջադրվի ՌԴ Քրեական օրենսգրքի 318-րդ հոդվածով («Պետական պաշտոնյայի նկատմամբ բռնություն գործադրում»): Հարցաքննության ժամանակ նա ամբողջությամբ ընդունել է իր մեղքը: Մոտ ապագայում նրա համար խափանման միջոց կընտրվի:
Ըստ հետաքննության` սեպտեմբերի 30-ին հանցակիցը «Շկոդա» մակնիշի ավտոմեքենայով վրաերթի էր ենթարկել ուղեկցորդ պահակին եւ մի քանի մետր քարշ էր տվել նրան ավտոմեքենայի վրա, ինչից հետո դիմել էր փախուստի: Փախուստի էին դիմել նաեւ Հայաստանի երկու քաղաքացիները, որոնք արտաքսման էին ենթակա Ռուսաստանից` ՌԴ տարածքում անօրինական գործողություններ կատարելու համար: Օտարերկրացիները դատապարտվել էին գողության համար:
Նրանք փախուստի էին դիմել, երբ արտաքսվողներին՝ 58-ամյա Ալեքսանդր Էմուխվարին եւ 50-ամյա Ալեքսանդր Դավթյանին, տեղափոխել էին D տերմինալ եւ տանում էին առանձին սենյակ` կորոնավիրուսի թեստ հանձնելու համար: Այդ պահին նրանք սկսել էին վազել: Դավթյանին հաջողվել էր փողոց հասնել, որտեղ նրան սպասում էր հանցակիցը տաքսիի մեջ: Երբ Դավթյանը ցատկել էր ավտոմեքենայի մեջ, վարորդը սեղմել էր գազի ոտնակին: Ուղեկցորդներից մեկը շտապել էր հատել ավտոմեքենայի ճանապարհը եւ վրաերթի էր ենթարկվել: Նրան տեղափոխել են հիվանդանոց: